Алматыда зейнеткерді ұрған кондуктордың автобуста жұмыс істеуіне рұқсаты болмаған
Қазір қарт жолаушыны желкелеп автобустан шығарған кондуктор полицияға түсінік беріп жатыр.
Алматыда №57 автобустың кондукторы зейнеткерді балағаттап, жұдырық ала жүгірген. Бұл оқиға қаланың қақ ортасындағы аялдамада болды. Қазір жолаушыға тап берген жігіттен полиция жауап алып жатыр. Ашуға булыққан кондуктор егде жастағы жолаушыны желкесінен сүйреп, автобустан шығарады. Кейін әкесімен жасты адамға жұдырығын сілтеген. Ақсақалды соққыға жығудан тайынбаған қызуқанды жігітті автобус жүргізушісі мен жолаушылар әрең тоқтатты. Автопарктің басшысы қоғамдық көліктерде келісім-шарт бойынша кондукторлар жұмыс істемейтінін жеткізді. Ал өз-өзіне ие болмаған жас жігіт жүргізушінің туысы екен. Яғни, автобус тізгіндеген жүргізуші жол ақысын төлегісі келмейтін азаматтарды бақылау үшін туысының көмегіне жүгініпті.