Ақтөбе облысында танымал кәсіпкер жұмбақ жағдайда жоғалып кетті

Ақтөбе облысында 54 жастағы тұрғын үш күннен бері табылмай жатыр. Соңғы рет Кенжебай Алдашов төтенше жағдайлар қызметіне хабарласып көмек сұраған, деп жазды КТК арнасы. Өзінің адасып кетіп, шұңқырға тап болғанын айтады. Содан бері онымен байланыс үзілген. Оның қай маңнан қоңырау шалғаны анықталды. 54 жастағы Кенжебай Алдашов жарты жыл бұрын құс фермасын жалға алады. Жұма күні шаруа қожалығынан шығып, Ақшат ауылына келген. Бұл жақта таныстарын жолықтырып, түн ішінде облыс орталығына кетеді. Содан бері оны көрдім-білдім деген жан жоқ. Із-түссіз жоғалған 54 жастағы тұрғын соңғы рет Ақшат ауылы іргесіндегі өзен бойынан құтқарушыларға хабарласады. Ол өзінің ағашқа әрең ілініп тұрғаны турасында айтады. Бірақ содан бері онымен байланыс үзілген. Іздестіру жұмыстарына өңірдегі құтқару қызметінің мамандары мен кинологтар жұмылдырылған. Еркітілер де көмектерін беріп жатыр. Өзен аумағын квадракоптермен төбеден шолып та шықты. Бірақ еш нәтиже берер емес. "Осы Ақжар ауылынан бастап, осылай қарай келе жатырмыз. Мына подхозы бар дейді 19 километр жерде. Соған дейін іздеп барамыз. Судың жағасымен, сай-сала шұңқырларды да қарап келеміз",-дейді Іздестіру жасағының жетекшісі Нұрбол Бозшин. Кенжебай Алдашов фермадан шыққан күні туыстарына хабарласпаған. Тек адасып жүргенін айтып төтенше жағдай қызметіне ғана бір рет қоңырау шалады. Хабарласа алмаған. Ұялы телефоны сөніп қалған болу керек. Бір хабарласқан. Содан кейін жоқ. Қазір қар болмағанымен, күн қара суық. Түнде сынап бағанасы минус 17-ге дейін жетіп тұр. Мұндайда далада қалған адамның үсіп қалу қауіпі бар. Сондықтан төтенше жағдайлар департаментіндегілер іздеуге шыққандардың саны көп болғанын қалайды. Ол үшін ұлттық гвардиядан жауынгерлерді көмекке жіберуді сұрапты.