Фарида (есімі өзгертілді – ред.) есімді келіншектің айтуынша, олар қазір заңды түрде ажырасып кеткен. Бұрынғы ерлі-зайыптылардың ортақ бес баласы бар.
"Күйеуім әкесіз өскен. Енем жұбайымды өзі өсіріп жеткізді. Үйінде жалғыз ұл болғандықтан енеммен бір үйде тұрып жаттық. Ол кісі екеуміздің арамызға жиі түседі. Ұлынан арамыздағы болып жатқан нәрсенің бәрін сұрап білгісі келіп тұрады. Он бес жыл үйде отырып қатарынан бес бала туу оңай емес. Мені де түсініңіз. Бала туамын, оларды өсіремін деп денсаулық, сымбатымның бәрін бердім. Құр сүлдерім қалды. Шынымды айтсам, өз-өзіме айнаға да қарай алмайтынмын. Сондықтан жолдасыммен ақылдасып, омырауымды үлкейтемін деп шештім. Ол да келісті. Бірақ анамызға айтпадық. Ертеңінде 1 миллион кредит алып, ота жасайтын клиникаға бардым", - деп ағынан жарылды келіншек.Фарида отадан соң оңалу үшін он күндей төркінінде жатқан.
"Үйге қайтатын күні енем бәрін біліп алыпты. Есіктен кіре сала бетіме шапшып, киім-кешегімді бетіме лақтырды. Балаларды қалдырасың деп шарт қойды. Күйеуім де анасын жақтап қалыпты. Бұл үйде маған орын жоқ екенін сезіп артқа бұрылып кеттім де қалдым. Артымнан іздеу былай тұрсын, күйеуім өзі ажырасуға арыз түсірді", - дейді келіншек.Екі-үш айдың ішінде олар сот шешімімен ажырасқан. Заң өкілі балаларды анасында қалдыруды ұйғарды. Фариданың сөзіне қарағанда ол күйеуімен қайта бас қосуға қарсы емес, тек енесімен бір шаңырақта тұрғысы келмейтінін айтады.
"Мен ота жасату үшін енемнен рұқсат сұрауым тиіс пе? Бастысы күйеуім келіскен. Енем артық кеткенін түсінсе екен", - дейді Nur.kz тілшісіне сұхбат берген келіншек.