Рентген әйел атанған атыраулық емші: Ота жасатқалы жүрген адамның өтіндегі тасты жоқ қылдым

Бала көтере алмай жүргендерге нәрестелі болуға көмектесіп, жүре алмайтындарды жүргізіп, көре алмайтындардың жанарын ашқан емші әйел Маржан Есениязова жайшылықта ешқандай да аспапта ойнай алмайды екен. Ол аян арқылы намаз үйреніп, сүрелерді жаттадым дейді. Ем кезінде қобыз, дауылпазда ойнап, айтатын сөздерім сол сәтте ауызыма түске қояды дейді. Емші атыраулықтар арасында "Рентген әйел" деген есіммен танымал. Себебі, ол алдына көмек сұрап келгендердің қай ағзасында қандай ақауы барын қарап тұрып айтып береді. "Менің мұндай қасиетім барын тоғыз жасымда әке-шешем білген. Себебі, оларға барлық нәрсені сартылдатып айтып отырады екенмін. ол кезде баламын, не айтып, қайдан біліп алғанымды өзім де білмеймін. Мысалы, үйде мал жоғалса оны қай тұстан іздеу керек екенін, қайда жүргенін, тірі ма әлде өлі ма екенін кәдімгідей сартылдатып айдады екенмін",- дейді емші Маржан Есениязова. Рентген әйел болашақты болжап, үй тазалау, қарым-қатынасты ретке келтіру сынды бақсылығы барын да жасырмайды. Тіпті кей азаматтар әсіресе  қыздар жағы "сүйіктімді қайтарып беріңізші, мына жігіт маған ғашық болып қалса екен" деген сынды ниеттерін ашық айтатын көрінеді. "Мен ондай біреудің басын айналдырып, біреуді- біреуге қаратып беруге қарсымын. Ондаймен айналысатындар бөлек. Мен мысалы, үй тазалау, жақсылыққа бастау, адамның жолын ашу деген сынды жұмыстарды Құран сүрелері, аяттары арқылы жүзеге асырамын. Мен емшілікті, бақсылықты бір жерден оқып алған жоқпын. Басында ауыл көлемінде адамдар көмек сұрап келіп жататын. Кейіннен 37 жасымнан бастап осы іске толық бет бұрдым. Адамдарға көмегім тиіп, біреудің дертіне шипа болып жатсам неге айналыспасқа? Маған мынанша төле деп ешкімге ақымды мөлшерлеп айтқан емеспін. Бірақ кез- келген жерде емдеп кетебермеймін. Өзімнің кеңсем бар, сол жер таза сонда отырып мәселесі бар адамға барынша көмектесуге тырысамын",- дейді Рентген әйел. Бұл туралы Маржан апай Еуразия арнасының "Пендеміз ғой" бағдарламасында айтты. Жүргізуші емшіге студияны тазалап, бағдарламаның бағын ашып беруді сұрады. бірақ Рентген әйел осында келіп отырғанының өзі сол маңайды тазартып тастайтынын айтты. Ал бағдарламаға қатысқан қонақтар болса емшінің сөздеріне мүлде иланбағандарын ашық айтты.