Жаңа жылдық дастарханға арналған ең дәмді әрі оңай 5 салат

Жаңа жыл – отбасылық мейрам. Ас үй ханшайымдары бұл күні ерекше дайындалатыны сөзсіз. Дастарханның сәнін келтіріп әрі қонақтарыңыздың таңдайынан дәмі кетпейтін  ерекше салаттардың түрлерін ұсынамыз.

• Биыл барыс жылы болғандықтан, жылдың басты символын көрсететін бейнедегі салат қонақтарыңызды таңғалдырмай қоймасы анық.

Құрамына: 320 гр піскен сиыр еті, 3 асылған жұмыртқа, тұздалған қияр, асылған сәбіз, қатты ірімшік, майонез, тұз, сәндеу үшін зәйтүн, жұмыртқаның ағы, бұрыш бұршақтары қажет.

Алдымен жалпақ тәрәлкеге піскен сиыр етін майдалап турап, барыстың басының формасын келтіріп саламыз. Оның үстіне майонез жағып, ұсақтап туралған тұздалған қиярды, содан соң асылған жұмыртқаны, ірімшікті үккіштен өткізіп, тағы да майонез жағып үстіне асылған сәбізді үккіштен өткізіп салу керек. Барыстың басының формасын жасап, көзін жұмыртқаның ағы мен зәтүннен, жұмыртқаның ағынан аузын, бұрыш бұршақтарымен мұрты мен мұрнының формасын келтіресіз.

• Оливье салатынсыз жаңа жылды елестету мүмкін емес. Салаттың классикалық жасалу әдісін ұсынамыз. Құрамын қалауыңызша өзгертуге болады.

Құрамына: піскен ет, асылған картоп, сәбіз, жұмыртқа, тұздалған қияр, консервіленген бұршақ, майонез, тұз бен қара бұрыш қажет.

Қоспалардың барлығын төртбұрыштап турап, майонез бен тұз, бұрыш салып, дәміне қарай тұз бен бұрыш салып араластырсаңыз ең дәмді салат шығады.

• Майонезсіз дайындалатын салат іздесеңіз бұл тағам сіздің дастарханыңыздың әрін келтіреді. Әрі небәрі 15 минутта дайындалады.

Құрамына: Фета ірімшігі, қызанақ, қияр, зәйтүн майы, лимон шырыны, сарымсақ, тұз қажет.

Алдымен соус дайындап аламыз. Зәйтүн майына жарты лимонның шырынын қосып, шымшым тұз салып араластырамыз. Соус дайын. Фета ірімшігі, қияр мен қызанақты төртбұрыштап турап шұңғыл ыдысқа салып, соусты құйып жақсылап араластырып дастарханға ұсына беруге болады.

• Малибу салаты кез келген дастарханның көркін ашып қоймай, уақыт үнемдеуге де септігін тигізеді.

Құрамына: қақталған тауық еті, қияр, қызанақ, ірімшік, қытырлақ нан, майонез немесе қаймақ, татымына қарай тұз керек.

Қажетті ингриеденттерді төртбұрыштап турап, майонез немесе қаймақты салып араластырып бетіне қытырлақ нанды қойып дастарханға қойсаңыз, әп-сәтте желініп кететініне кепілдік беремін.

• Ананас қосылған салат дастарханның көркі ғана ерекше дәмімен қонақтарыңызды тамсандырады.

Бізге қажет ингридиенттер: ананас, консервіленген жүгері, тауық еті, асылған жұмыртқа, майонез. Сәндеу үшін салат жапырағы керек.

Тауық етін ұсақтап турап тәрелкеге салатын жапырағын төсеп,  бірінші қабат етіп орналастырасыз, содан соң консервіленген жүгеріні, сосын жұмыртқаны саласыз Әр қабаттан кейін майонез жағып отыруды ұмытпаңыз. Татымына қарай тұз да салсаңыз болады. Содан соң ең беткі қабатына ананасты орналыстырып қонақтарыңызға ұсынуға болады.

Дәмді әрі тез салаттарымыз сіздің дастарханыңыздың сәні болсын. Келе жатқан жаңа жыл құтты болсын!