Кәмелетке толмаған баланы зорлаған автобус жүргізушісіне сот үкім шығарды

Астанада кәмелетке толмаған баланы зорлады деген автобус жүргізушісі 17 жылға бас бостандығынан айырылды, - деп хабарлайды қалалық соттың баспасөз қызметі.

3 қарашада Астанадағы қылмыстық істер жөніндегі мамандандырылған ауданаралық соты үкім шығарды.

Сотталушының қылмыстық жауаптылығы мен жазасын жеңілдететін және ауырлататын мән-жайлар анықталмаған.

Қылмыстық кодекстің 120-бабы 3-1 бөлігі 1-тармағы санкциясында белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, 15 жылдан 17 жылға дейінгі мерзімге бас бостандығынан айыру түріндегі жаза көзделген.

Ер адамға осы бап бойынша жазаның ең жоғарғы шарасы – кәмелетке толмағандармен жұмыс істеуге байланысты педагогикалық және өзге де қызметпен айналысу құқығынан өмір бойына айыра отырып, 17 жылға бас бостандығынан айыру жазасы тағайындалған. Жазасын қылмыстық-атқару жүйесінің қауіпсіздігі жоғары мекемелерінде өтейді.

Соттың үкімі заңды күшіне енген жоқ.