Мемлекет басшысының жарлығымен Қайрат Келімбетов «Астана» халықаралық қаржы орталығының басқарушысы қызметінен босатылды, деп жазды KYN.KZ сайты.
Ол бұл қызметке 2015 жылы тағайындалған болатын.
Келімбетовтің орнына Ренат Бектұров келді. Бектұров 1984 жылы 13 қазанда Алматы облысында дүниеге келген. Лестер университетінің банк ісі және қаржы магистрі дәрежесіне ие. Оның қаржылық қызмет көрсету саласында 10 жылдан астам тәжірибесі бар.
АХҚО-да 2016 жылдан бері жұмыс істейді. АХҚО құрылымында Astana International Exchange басқармасының төрағасы болып жұмыс істеді.
2022 жылдың қыркүйегінде АХҚО-да 65 елден 1500-ден астам компания тіркелгені хабарланды. Тартылған инвестицияның жалпы көлемі — 6,9 миллиард доллар.
Астана халықаралық биржасы (AIX) арқылы 321 миллион доллардан астам меншікті капитал және 2,1 миллиард доллар қарыз капиталы тартылды.
