Талдықорғанда қаңтардағы тәртіпсіздіктер кезінде әрекетсіздік танытты және билігін асыра қолданды деп айыпталған ұлттық қауіпсіздік генералы сотталды.
Қаңтар оқиғасы кезінде генерал-майор ҰҚК-ның Алматы облысындағы департаментін басқарды. Айыптаушы тараптың мәліметінше, ол 2022 жылдың 5 қаңтарында өзінің қызметтік міндеттеріне көңіл қоймай, әкімшілік ғимаратты қорғау шараларын қолданудың орнына қарамағындағыларға кетуге бұйрық берген.
Облыстық ведомство басшысы сондай-ақ қызметтік және құпия құжаттарды жоюды бұйырған. Салдарынан ҰҚК ғимаратын басып алуға жол берілді.
Талдықорған қалалық сотының үкімімен бұрынғы басшы ҚР Қылмыстық кодексінің 362-бабының төртінші бөлігі (Ауыр зардаптарға әкеп соққан билікті және лауазымдық өкілеттіктерді асыра қолдану) бойынша кінәлі деп танылды.
Сот оны алты жылға соттады. Сондай-ақ сотталушы 10 жыл мерзімге құқық қорғау органдарында белгілі бір лауазымдарды атқару құқығынан айырылды.
"Қазақстан Республикасының президентіне сотталушыны ұлттық қауіпсіздік генерал-майоры арнаулы атағы мен мемлекеттік наградаларынан айыру туралы ұсыныс енгізілді", - делінген Талдықорған қалалық соты таратқан хабарламада.
Соттың үкімі әлі заңды күшіне енген жоқ.
Еске сала кетейік, Талдықорғанда Алматы облысының бұрынғы полиция бастығы генерал Күдебаевқа қатысты тағы бір сот процесі өтті. Күдебаев бірнеше отырысқа келмеді, содан кейін оның елден қашып кеткені белгілі болды.
Алдыңғы мақала
Ұқсас жаңалықтар
