Маралды тұрғындары талаптары орындалмаса негізгі көпірді жабатындарын айтты

Маралды ауылының жергілікті қауымдастық тұрғындары Шығыс Қазақстан облысының әкімі Даниал Ахметовке тағы жүгінді. Олар жергілікті билік тарапынан түпкілікті шешім қабылданбаса, көпірді жаппақ, деп жазды "КҮН.КЗ" тілшісі ulysmedia.kz сайтына сілтеме жасап. “Біз биыл өз мәселелеріміз бойынша Сізге талай жүгіндік. Енді Президенттің 2022 жылғы 7 наурыздағы «Әкімдердің халықпен кездесулерін өткізу туралы» Жарлығының 3-тармағына сәйкес («Барлық деңгейдегі әкімдер тұрғындардың өтініші бойынша және қажет болған жағдайда күнтізбеден тыс халықпен кездесулер өткізсін») 12 маусымға дейін келіп, мәселемізді шешіп беруіңізді талап етеміз. Ең алдымен зауыттың заңсыз құрылысын тоқтатыңыз, өйткені. жер және экологиялық кодекстер, жер қойнауы және жер қойнауын пайдалану туралы кодекстер бұзылған. Қоғамдық тыңдауларды өткізу кезінде тұрғындардың құқықтары бұзылған, алтын өңдейтін зауыт құрылысына тұрғындардың келісімі алынбаған”, – деп жазды тұрғындар. Арызданушылардың екінші талабы – 5т (Қыстау Қүршім, Қойтас) және 20т (Маралды) көпірлері алтын өндіруші компаниялардың ауыр техникаларының өтуіне байланысты апатты жағдайда. Егер бұл көпірлер істен шықса, ауылдықтар барлық бағытта байланыссыз қалмақ. “Үшінші, Күршім-Маралды жолы кеңестік кезеңнен бері жөнделмеген, асфальт болмаған, ауыр техниканың кесірінен қиыршық тасты жолдың жағдайы өте нашар. Жолды жарамсыз ететін ауыр жүк көліктерінің қозғалысына тыйым салуды талап етеміз. Төртінші, 2020 жылы ауылды сумен қамту үшін 350 млн теңгеге су құбыры желілерін салуға тендер өткізіліп, ауыл көшелеріне траншеялар қазылды, бұл жоба аяқталмаған. Біз жобаның аяқталуын немесе көшелерімізді бұрынғы қалпына келтіруді талап етеміз. Біз заңсыздыққа қарсымыз, егер талаптарымыз орындалмаса апатты жағдайды және көпірді сақтап қалу  үшін көпірге шлагбаум орнатуға мәжбүр боламыз”, – дейді маралдылықтар. Олар көптеген өтініштерінің ескерусіз қалғанын да алға тартады.