Арыстағы жарылыста мүлкінен айырылғандар әлі өтемақы ала алмай жүр

Жарылыстан жапа шеккен Арыс тұрғындары әлі күнге дейін өтемақы алмаған. Арада 4 жыл өтсе де, баспаналар әлі бүтінделмеген. Арнайы комиссия оларды зардап шеккендер қатарына қоспаған. Алайда сот жарты жыл бұрын өтемақы өндіру туралы қаулы шығарған, - деп хабарлайды КҮН.КЗ тілшісі Almaty.tv-ға сілтеме жасап. Еске салайық, Арыстағы жарылыс осыдан 4 жыл бұрын болған еді. Телеарна мәліметінше, жапа шеккен тұрғындар әлі күнге дейін өтемақы ала алмай әлек. Нақтырақ айтсақ, жарылыс кезінде үйі қираған 55 азаматқа тиесілі мемлекет қаржысы сол күйі қолға тимеген. Әділдікке жету үшін жиналғандар сотқа да арызданып, оны жеңіп шыққан. Алайда "уәде етілген 1 миллард теңгенің көлеңкесін де көрмедік" дейді тұрғындар.

Телеарна мәліметінше, жапа шеккендердің бірі қираған үйде күнелтуге мәжбүр. Жанайқайы билікке жетпеген көпшілік шағымын айту үшін бейбіт митингіге де шықпақ болған. Алайда әкімдік рұқсат бермеген.

Митингіге рұқсат бермеген Түркістан облысы, Арыстың әкімдігі жауапкершілікті министрлікке ысырған. Ал мәселе бойынша хабарласқанда ведомство өкілдері әзірге жауап бере алмайтынын айтқан.