Депутат Дәулет Мұқаев 5 мың адамды алдаған алаяқты жазалауды талап етті
Депутаттың сөзінше алданғандар жалпы шығыны 30 млрд теңге
Депутат Мұқаев бүгін отырысқа үш папкамен келіпті. «Менде мұндай папкадан үш пакет бар» дейді. Сөзінше, оның бәрі - Арайлым деген әйелге алданған адамдардың шағымы, деп хабарлайды KYN.KZ.
Мұқаевтың сөзінше, Арайлым Қытайдан тауар әкелемін деп, ақша жинап, мыңдаған адамды алдаған. Алданғандар саны 5 мың. Жалпы шығын 30 млрд теңге.
«Өткен жолдың өзінде 20444 дерек тіркеліп, 16,5 млрд теңгеге залал келген. Ал биыл жыл аяқталмаса да, 15 мыңға жуық дерек тіркеліп, зардап көлемі 11 млрд теңгеден асты. Олардың құрбаны көбінде үйде отырған аналар мен қыз-келіншектер. Интернет-алаяқтықтың түр түрі бар. Соңғы уақытта кеңінен етек жайып келе жатқан әлеуметтік желі арқылы байер деген атаумен Қытай, Түркия, АҚШ-тан арзан тауар жеткізушілер көбейген. Бірі елімізде тіркеліп, заңды жұмыс істесе, енді бірі халықты толығымен алдап жүр. Қазір байытамын дейтін байерге барын берген қара халықтың базынасын да жиі естіп жүр», - дейді депутат.
Депутат халықтың алдап соққан адамдардың бірін мысалға келтірді. Солардың бірі Айс Мұратова деген лақап атпен танымал. Шын аты – Арайлым дейді депутат.
«Ол соңғы екі жылда халықтың сеніміне кіріп, сауда жасап, өзін жақсы жағынан жарнамалаған. Оның ішінде Қытайдан арзан тауарлар, ыдыс-аяқтар жіберемін деген әлеуметтік желі арқылы өзін ірі кәсіпкер ретінде көрсетіп, қол астымда заңды жұмысшыларым бар деп елді сендіріп келген. Төлемдерді ешқандай келісімшартсыз, яғни карталық шотқа, аударма арқылы жіберуді сұраған. Басында аз-маз ақшаға қажетті тауарларды жіберіп, кейін ірі сомаға жеткенде барлық салымшыны бір күнде алдап кеткен. Содан бері не тауар, не ақша қайтарылмаған. Желідегі ақпарат бойынша еліміздің әр өңіріндегі 5 мыңнан астам азаматтан жалпы сомасы шамамен 30 млрд теңге жинап алып, барлығын алдап кеткен. Енді сауда жасап, күн көрмекші болған азаматтар арыз жазып шағымдансақ та, бірнеше айдан бері еш нәтиже шықпайды дейді», - деді Дәулет Мұқаев.
Мәжілісменнің сөзінше, бұл мәселе күннен күнге ушығып жатыр. Ол бұл мәселеде тергеу жұмыстарының әділ жүргізілуін сұрап отыр.
«Алданған отбасылардың жағдайы ауыр. Қаншама шаңырақ шайқалуға жақын. Бұл схема таза қаржылық пирамидаға ұқсайды. Мен әкелген мына папкада аударылған шоттар мен көшірмелер бар. Мұндай папкадан 3 пакет бар. Соның барлығын (авт. – шот пен көшірмелер) санаса, 30 млрд теңгеден асады. Бұл дегеніміз - 10 шақты мектеп салатын ақша», - Дәулет Мұқаев.