"Шопыр рөлде отырып инсульт алған": Алматы облысында 13 жасар оқушы автобус толы адамды құтқарды
Ол жүргізушінің өзін нашар сезінгенін бірден түсініп, жылдам әрі орынды әрекетке барған
Алматы облысында 13 жасар бала автобус жолаушыларын құтқарды. Автобус жүргізушісі геморрагиялық инсульт алып, көлік құралын басқара алмай қалған. Бастапқыда бәрі қалыпты болғанымен, жүргізуші кенеттен есінен танып қалыпты. Басқарусыз қалған қоғамдық көлік жүйткіп барып газ құбырын жайпап өткен. «Жас жігіт тез арада тежегішті басып, автобусты тоқтатпағанда, тұрғын үйге соғылар еді»,- дейді куәгерлер.
Қоғамдық көлікте 20-ға жуық адам болған. Бүгінгі күннің батыры атанған жасөспірім 24 лицейдің 8-ші сыныбында оқиды. Аудандық әкімдік пен білім басқармасының өкілдері 13 жастағы Ақжолдың әрекетін жоғары бағалап, батылдығы үшін арнайы сыйлықтар табыстады. Сондай-ақ ержүрек баланың ата-анасын да алғыс хатпен марапаттады.
Автобус жүргізушісіне операция жасалды. Қазір Іле аудандық орталық ауруханасының реанимация бөлімінде ем қабылдап жатыр. Науқастың жағдайы бірқалыпты.