Шымкентте фастфудты пара ретінде алдыртқан әділет капитаны сотталды
Сотталушы істі қарау кезінде кінәсін толық мойындады, өкінетінін айтты
Шымкент қаласының қылмыстық істер жөніндегі ауданаралық сотында К.-ға қатысты қылмыстық іс қаралды. Оған Қылмыстық кодексінің 366-бабының 1-1-бөлігі («Құқық қорғау органының қызметкері бола тұра, пара алу») бойынша айып тағылды.
К. Шымкент қаласы және Түркістан облысы бойынша ҚАЖД Еңбекші аудандық пробация қызметі бөлімінің аға инспекторы лауазымын атқарып жүріп, яғни құқық қорғау органының қызметкері бола тұра 12 қазан 2023 жылы сағат 20:00 дер шамасында және 22 қазан 2023 жылы 19 сағат 30 минут шамасында өзінің бақылауындағы сотталған – жаза өтеуші Н.-ның пайдасына жасаған іс-әрекеті, яғни қадағалау және бақылау жұмыстарын жүргізу кезінде жалпы қамқорлығы үшін 12 668 теңге тұратын тағамдарды (фастфуд) пара ретінде алдырған.
Прокурор К.-ға ҚК-нің 366-бабының 1-1-бөлігімен, 2 жыл бас бостандығынан айыру жазасын және оны мемлекеттік қызметте жұмыс атқару құқығынан өмір бойына айыру қосымша жазасын тағайындауды сұрады.
Сотталушы мен оның қорғаушы адвокаты сотталушыға жеңіл жаза тағайындауды сұрады.
Сот, сотталушының қылмыстық жауапкершілікті жеңілдететін мән-жайлар ретінде оның жасаған қылмысын толығымен мойындап өкініш білдіргенін, алдын сотты болмағанын, асырауында жас баласы бар және қазіргі таңда екінші балаға жүкті екенін, ал өзінің кәсіби антын бұза отырып қылмыс жасағанын қылмыстық жауапкершілікті ауырлататын мән-жай ретінде ескерді.
Үкім заңды күшіне енген.