Үкімет басшысы Олжас Бектенов ең алдымен президент тапсырмаларын іске асыру мәселелері жөніндегі кеңесте Міндетті әлеуметтік медициналық сақтандыру жүйесін реформалау қажеттігіне назар аударды, деп хабарлайды KYN.KZ премьер-министрдің баспасөз қызметіне сілтеме жасап.

Олжас Бектенов МӘМС жүйесі елеулі қайта форматтауды қажет етеді деп санайды. 

"Қаражатты тиімсіз жұмсау мен артық жалған тіркеулер бола тұра оны қаржыландыруды ұлғайтуға жол берілмейді. Сала толық цифрландыру мен ашықтықты талап етеді", — деді ол.

Сонымен қатар ол үкімет формализм мен бюрократиялық сарсаңға салуды толығымен жоя отырып, стереотиптерден арылу қажеттігін атап өтті.

"Министрлер өз бетінше шешім қабылдай білуге тиіс, салалық мәселелерді өз деңгейінде жедел шешулері қажет. Жұмыс қарқыны жоғары, талап қатаң болатынын әркім түсінуі тиіс", — деп түйіндеді сөзін премьер-министр.

Отырыс барысында үкімет басшысы цифрлық трансформацияны жүргізу, көлік және ауыл шаруашылығы салаларын дамыту, "Жайлы мектеп" және "Ауылдық денсаулық сақтауды жаңғырту" ұлттық жобаларын іске асыру, сондай-ақ азаматтарды әлеуметтік қолдау, мемлекеттік сатып алу және мемлекеттік-жекешелік әріптестік тетіктерін реформалау жөнінде нақты тапсырмалар берді.