"Жұмыс істемесең, бауырларыңды көрмейсің": 5 жыл құлдықта мал баққан балалар туралы жаңа деректер шықты
Ұлытау облысында балаларды 5 жыл құлдықта ұстаған өгей ана қамауға алынды. Депуттаттар дабыл қақты.
Ағайынды балаларды асырап алған ерлі-зайыптылар жеткіншектерді қаладан 20 шақырым жердегі өз фермаларында қамап ұстап, мал бағуға мәжбүрлеген, деп хабарлайды KYN.KZ Астана арнасына сілтеме жасап.
Ұлытау облысында балаларды 5 жыл құлдықта ұстаған өгей ана қамауға алынды. Күдікті ағайынды 3 баланы 2018 жылы асырап алған. Қамқорлық көрсетудің орнына қара жұмысқа жегіп, қоғамнан алыс ұстапты. Ауырып жатыр деп сабаққа да жібермеген. Аш құрсақ балалардың құр сүлдері ғана қалған.
Балалардың біреуі - қыз, екеуі - ұл бала. 5 жыл бұрын балалар үйінен патронат отбасының асырауына берілген. Ол кезде үлкені 14-те, кішісі 8 жаста болған. 2 табын жылқы мен 18 сиырды баққан балалар адам төзгісіз жағдайда өмір сүріп келген.
Динара ЗӘКИЕВА, ҚР БАЛА ҚҰҚЫҚТАРЫ ЖӨНІНДЕГІ УӘКІЛІ:
19 жастағы қыз колледж бітірген. Бірақ іс жүзінде сабаққа бармаған, - дейді амбудсмен. Ортаншы ұлды да оқуға жібермей, тек ауырғаны туралы анықтама ұсынып отырған.
Ерболат САТЫБАЛДИН, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Өгей ата-ана қыз баланы «жұмыс істемесең, бауырларыңды көрмейсің» деп қорқытқан. Оқиғаға қатысты қылмыстық іс қозғалды. Сараптама жүргізілуде. Балаларға жан-жақты қолдау көрсетіліп жатыр.
Сафура ТӨЛЕКОВА, ОБЛЫСТЫҚ БІЛІМ БАСҚАРМАСЫНЫҢ ЖЕТЕКШІСІ:
Бұл отбасы жақында патронатқа тағы бала алғысы келген. Тиісті мекемелерден басқа да балалар бар ма деп сұрастырған.