Қарағандыда ер адам он жыл бұрын ажырасып кеткен әйелін балаларының көзінше пышақтап өлтірді
Балалар анасы өлерінен 1 сағат бұрын полиция шақырған. Тәртіп сақшылары келгенімен мас ер адамды пәтерде қалдырып кеткен.
Қарағандыда ер адам 10 жылдан астам уақыт бұрын ажырасып кеткен әйелін пышақтап өлтірді деп күдіктенеді. Бұл туралы құқық қорғаушы Серік Беркамалов өз Instagram парақшасында жариялады деп хабарлайды KYN.KZ ақпарат агенттігі.
Бұл оқиға осы жылдың 25 сәуір күні болған. Айтуынша, күдікті балаларының көзінше әйелге бірнеше мәрте пышақ сұққан. 52 жастағы марқұмның артында 16 жасар қызы мен 14 жасар ұлы қалыпты. Ол осы уақытқа дейін әйеліне маза бермей келген. Жәбірленуші полицияға жүгініп отырғанымен, күдікті әрдайым жазасыз қалыпты.
"Сол күні ұлы әкесінің өлтіремін деп қорқытқанын полицияға қоңырау шалып айтып берген. Солай анасын қорғамақ болған. Содан кейін екі полиция қызметкері келіп, оның қауіпті және мас екенін көріп тұрса да ешқандай шара қолданбаған! Әйел мен балаларын абьюзермен қалдырып кетіп қалған! Екі сағаттан кейін ер адам Гүлмираны пышақтап, пәтерден қашып кеткен. Балалар қайта зардап шекпеді, бірден полиция мен жедел жәрдем шақырған", - деп жазды Беркамалов.
Жедел жәрдем жиырма минуттан кейін келген. Салдарынан әйел ауруханаға жетпей жатып жолда жан тәсілім еткен. Ал күдікті осы уақытта аулада полицияны күткен.
"Полициядан қылмыскер жасырынуды ойламады. Көршілері өзі кездесуге шыға жаздады дейді. Учаскелік полицей қылмыскерді қатаң ұстаудың орнына оған шылым ұсынған (осы тұста “өзі осыған жеткізген шығар” деген бишімбаевты еске түсіреді). Бұл не? Адам өміріне немқұрайлылық, кәсіби немқұрайлылық, полицияның қасақана беделін түсіру ме? Білмеймін, бірақ біз оны анықтаймыз және барлық кінәлі полицейлерді жазаға тартуға ниеттіміз. Әрине, қылмыскер заң алдында қатаң түрде жауап береді", - дейді ол жазбасында.
Марқұмның балаларына тегін құқықтық және психологиялық көмек көрсетілетіні айтылды. Кәмелетке толмаған балаларға Салтанат Нүкенованың ағасы Айтбек Амангелді көмектеседі.
Қарағанды облысы полиция департаментінің баспасөз қызметі бұл жағдайға түсініктеме берді. Ведомствоның мәліметінше, кісі өлтіру фактісі бойынша қылмыстық іс қозғалған. Күдікті уақытша ұстау изоляторына қамалды, қажетті сараптамалар тағайындалды, тергеуге ұатысты іс-шаралар жүргізілуде.
"Ерлі-зайыптылар ажырасқанымен бірге тұрған. Соңғы рет полицияны екі жылдан астам уақыт бұрын 2022 жылдың қаңтарында шақырған. 25 сәуір сағат 18:30-да кісі өлтіру дерегі тіркелген күні полицияға қызы ата-анасының арасындағы қаржылық мәселелер бойынша жанжал шыққанын айтты. Полиция келген кезде ерлі-зайыптылар шай ішіп отырған. Жұбайы полициядан күйеуін алып кетуді немесе үйден шығарып тастауды талап еткен. Ер адамға қатысты әкімшілік хаттама жасалып, қорғау нұсқамасы мен сотқа келгені туралы хабарлама шығарылды. Көршілердің айтуынша, бұған дейін отбасыда жанжал болмаған”, – деп толықтырды департаменттің баспасөз қызметі.