Қасым-Жомарт Тоқаев Халықаралық балалар күнімен құттықтады
Президент балалар біздің болашағымыз екенін атап, жас азаматтардың құқығын қорғау, денсаулығын сақтау мемлекеттің басты міндеті екенін айтты.
Мемлекет басшысы Қасым-Жомарт Тоқаев бүгінгі 1 маусым Халықаралық балаларды қорғау күнімен құттықтады, деп хабарлайды KYN.KZ ақпара агенттігі.
“Баршаңызды Халықаралық балаларды қорғау күнімен құттықтаймын! Жарқын жаз өскелең ұрпаққа қамқорлықтың символына айналған осы мерекеден басталады. Ұл-қыздарымыздың парасатты және жан-жақты болып өсуіне жағдай жасау, жас азаматтардың құқығын қорғап, денсаулығын сақтау әрдайым мемлекеттің басты басымдығы саналады. Балалар – біздің болашағымыз. Сондықтан еліміздегі әрбір жеткіншектің мейірім мен қамқорлыққа бөленіп, үлкеннің қолдауын сезінуі, ертеңгі күнге сеніммен қарауы өте маңызды. Мен жас ұрпақ Әділетті Қазақстанның негізгі қағидаттарын нақты жүзеге асырып, «Адал азамат» тұжырымдамасының озық идеалдарына толық сай болады деп сенемін”, - дейді мемлекет басшысы.
Сонымен қатар, Тоқаев өскелең ұрпаққа төл тарихымызды және мәдениетімізді құрметтеуді үйрету қажет екенін айта кетті.
“Ол үшін біз бүкіл қоғам болып жалпыұлттық құндылықтарымызды ұрпақтың бойына сіңіруіміз және оларды еңбекқорлық пен білімпаздыққа баулуымыз керек. Сондай-ақ төл тарихымыз бен мәдениетімізді құрметтеуге үйретуіміз қажет. Барлық бала ата-анасы мен жақындарын оқудағы, шығармашылық саладағы және спорттағы жетістіктерімен, жақсылық пен жасампаздыққа ұмтылысымен қуанта берсін! Баршаңызға зор денсаулық, бақ-береке, толайым табыс тілеймін!”, - деп сөзін аяқтады Тоқаев.