“Тезірек шешілуіне үміттенеміз”: Цифрлық даму министрі Жаслан Мәдиев Павел Дуровқа қатысты жазба жариялады

Цифрлық даму министрі Жаслан Мәдиев Telegram мессенджерінің негізін қалаушы Павел Дуровтың қамауға алынғанына қатысты Facebook-парақшасында жазба жариялады, деп хабарлайды KYN.KZ ақпарат агенттігі.

Министр Павел Дуровқа қолдауын білдіргісі келетінін жеткізген.

"Мен Павел Дуровқа және Telegram командасына соңғы оқиғаларға байланысты қолдауымды білдіргім келеді. Сенбі күні Павелдің француз билігімен контент модерациясының жоқтығы және құқық қорғау органдарымен ынтымақтастықтан бас тартқаны үшін ұсталғаны хабарланды. Цифрлық даму, инновациялар және аэроғарыш өнеркәсібі министрлігі атынан Telegram командасымен өзара әрекеттесудің оң тәжірибесі қалыптасқанын атап өткім келеді. Біз дербес деректердің таралуын, есірткі трафигімен күрес және мессенджердегі басқа да заңсыз әрекеттерді тоқтату бойынша мәселелерді бірнеше рет сәтті әрі жедел шештік. Telegram командасы әрдайым азаматтардың қауіпсіздігін қамтамасыз ету үшін ынтымақтастыққа дайын, құпиялылық пен сөз бостандығын қорғау қағидаттарына адал болып келеді", - деп жазды министр.

Сондай-ақ, ол Telegram арнасының негізін қалаушысы еліміздегі ауыл балаларына қолдау көрсетуге бағытталған IQanat жобасына қамқорлық танытып, $365 000 сомасына 12 грант бөлгенін атап өтті. 

“Біз цифрлық кеңістікте қауіпсіздік пен еркіндік арасындағы тепе-теңдікті сақтаудың маңыздылығын түсінеміз және Telegram-мен конструктивті ынтымақтастықты жалғастыруға дайынбыз. Сонымен қатар Павел Дуров Қазақстанға өткен сапарында қазақстандық ауыл балаларына қолдау көрсетуге бағытталған IQanat жобасының қамқоршыларының бірі болып, $365 000 сомасына 12 грант бөлді. Ол тек қаржы бөлумен шектелмей, оқу процесін зерттеуге, балаларды іріктеуге, олардың өмірбаяны мен мектептегі үлгерімін зерделеуге тікелей қатысты. Мен Павелдің командасына балалардың дамуына шын көңілмен қызығушылық танытып, жанашырлық танытқаны үшін ризамын. Аталған жағдайдың тезірек шешілуіне үміттенеміз", - деді Мәдиев.