Белгілі әнші Абай Бегейдің орындауындағы «Аспанға қараймын» өлеңіне ән жазып берген композитор такси жүргізушісі болып жүр, деп хабарлайды KYN.KZ ақпарат агенттігі. 

Дәуір Абайұлы бұл туралы «Астарлы ақиқат» бағдарламасында айтты. Сөзінше, әншінің бағын ашқан ән оған ешқандай пайда әкелмеген.

«Шынын айтқанда, қазір шығармашылықтан жырақтап қалдым. «Аспанға қараймын» әні хит болды. Бірақ, маған одан келген пайда «Қызылорданың Дәуір деген жігіті екен» деген халықтың сөзі ғана. Одан басқа байлығы да, пайдасы да болған жоқ. Абай Бегеймен қазір қарым-қатынасымыз қатты жақын деп те айта алмаймын. Бір-екі рет көмек сұраған соң «жоқ» деді, мен қойдым. Ол осы әннің арқасында жағдайын жасады. Бір хабарласып, «Дәке, қалайсың?» деп сұрауға болар еді. Ақшалай көмек сұрағанымда «жоқ» деді. Оған дейін де арамызда түсінспеушілік, кикілжің болғаны рас», — дейді композитор Дәуір Абайұлы.

Композитор Абай Бегейге бұл әнді Ұлықпан Жолдасовтың өтінішімен берген. Ол кезде ақша төлеуге әншінің жағдайы болмапты. 

«Табысым өзіме жетеді. Несиеге алған көлік, айына 148 мың теңге төлеймін. Барлық несием 298 мың теңгеге тең. Күніне 10 мың теңге табамын. «Аспанға қараймын» әні Ұлықпан Жолдасовтың өтінішімен Абай Бегейге берілген болатын. Ұлықпан ағам «Абайдың жасы 40-қа келді, бірақ әлі хит әні жоқ» деген еді. Ол кезде Абайдың жағдайы жоқ болған. Шақырып алып, 5-10 мың теңгем бар еді деді. Артынан одан қанша алғанымды санаған да жоқпын. Солай ұмытылып кетті. Ол кездері Абайға қатты ренжіп жүрдім. Менің атымды жасыруға тырысты. Ол жағдайдан кейін әншілермен жұмыс істегім келмей  қалды. Үкімет тарапынан гонорар түсіп тұрды. Соңғы 6-7 жылда ол да тоқтап қалды. Сондықтан жан-жақтан нәпақа іздеп, такси жүргізушісі болып кеттім», — дейді Дәуір Абайұлы.