“Бәрі жүрегімізге батады”: Садриддин Ахмедов Талғардағы жағдайға қатысты пікір білдірді
Спортшы жеңісін қазақ еліне арнайтынын жеткізді
Қазақстандық боксшы Садриддин Ахмедов (15-0, 12 KO) орта салмақта өнер көрсетіп, кезекті жеңісіне қол жеткізді. Ол жекпе-жектен кейін бұл жеңісін қазақ еліне арнайтынын мәлімдеді, деп хабарлайды KYN.KZ ақпарат агенттігі.
Сонымен қатар спортшы Талғарда қаза тапқан Шерзат Болатқа қатысты пікір білдірді.
«Бұл жеңісіммен барша қазақ елін 16 желтоқсан – Тәуелсіздік күнімен құттықтаймын. Сондай-ақ, Қазақстанда көп жағдай болып жатқанын жақсы білесіздер. Соның бірі – Шерзатқа байланысты жағдай. Шетелде жүрсек те, оның бәрі жүрегімізге батады. Еліміздің көк туын осындай ареналарда көтеру – біз үшін үлкен мәртебе. Қазақ елі, сіздерді қатты жақсы көремін. Осы жеңісімді қазақ еліне арнағым келеді», - деді Садриддин Ахмедов.
Еске салсақ, отандасымыз бүгін АҚШ-тың Санта-Инез қаласында өткен Hollywood Fight Nights бокс кешінде америкалық боксшы Рафаэль Игбоквемен (17-6, 7 КО) жұдырықтасты. Жекпе-жек жетінші раундта Садриддиннің нокаутымен аяқталды. Ахмедов-Игбокве бәсекесі әйгілі қазақстандық Геннадий Головкинмен ұзақ уақыт бірге жұмыс істеген промоутер Том Леффлердің 360 Promotions шоуы аясында өтті.