Алматы метросының жаңа станцияларын салуға 1 миллиард доллар қаражат жұмсалады. Бұл туралы оңтүстік астана әкімі Ербола Досаев ОКҚ брифингінде өткен "Алматы қаласының әлеуметтік-экономикалық дамуы туралы" кездесуінде мәлім етті, деп хабарлайды KYN.KZ ақпарат агенттігі KAZ.NUR.KZ сайтына сілтеме жасап.

Оның айтуынша, дәл осы сома алдын ала екі жаңа метро желісін қаржыландыру үшін мақұлданған. Алайда қаржыландыру көзі әлі анықталмаған. Қала басшысының айтуынша, құрылысқа қарыз алу үшін бірнеше нұсқа қарастырылып жатыр. 

"Мемлекет басшысының қолдауымен біз үкіметпен бірлесіп, метро құрылысын қаржыландыру үшін қарыз алу мүмкіндігін қарастырып жатырмыз. Құрылыс екі бағытта жүргізіледі: "Барлық" базарына дейін 5,3 км және "Жібек Жолы" станциясынан әуежайға дейін 14 км. Жалпы ұзындығы 19,5 км болатын метро желілерін салуды жоспарлап отырмыз. Мемлекет басшысы әкімдіктің жобаны жүзеге асыру үшін үкіметтік кепілдік беру ұсынысын қолдады, қазіргі таңда бюджеттік заңнамаларға өзгерістер енгізіліп жатыр, осылайша мұндай жобалар республикалық бюджет есебінен қаржыландырылады. Мәжіліс бізді қолдады. Біз Сенаттағы жұмыстың аяқталуын күтіп отырмыз, содан кейін шешім күшіне енеді", - деді әкім.

Ол келіссөздер қажетті қаржыны ұсынатын ұйымдармен жүргізілетінін айтты. "Біз барлық кредитормен, оның ішінде "Эксим банк", ЕБРР (Еуропалық қайта құру және даму банкі), Азия даму банкімен келіссөздер жүргізіп жатырмыз. Өзімізге ыңғайлы әрі арзан жағдайларды таңдаймыз. Қажетті жағдайлар дайын болғанда, конкурс негізінде мердігерді таңдаймыз. Мәжіліс депутаты айтқандай (Сергей Пономаревті айтып отыр – авт. ескертпесі), бірдеңе таңдалды деп айтуға болмайды — бұл біздің жұмыс жүріп жатқан келіссөздеріміз. Барлық ақпарат дайын болғанда, оны Қаржы министрлігімен бірлесіп жариялаймыз. Бәлкім әдеттегідей бұл қаржылық донорлар консорциумы болар", - деді Досаев.

Ол 2024 жылдың бірінші тоқсанының соңына қарай әкімдіктіңқандай жағдайларда жұмыс істейтінін анықтайтынын атап өтті. Алдын ала алынатын қарыз сомасы 1 миллиард доллар болуы мүмкін. Сонымен қатар әкімдік тек техникалық-технологиялық тұрғыдан метро салуға дайын серіктестерді таңдайтынын айтты. Оның сөзінше, оңтайлы мерзімдер — 3-3,5 жыл. Екі жаңа станция бір уақытта салынады.

Әзірше, спикердің айтуынша, "Барлық" базарына қарай бағыттағы жер телімдері сатып алынып жатыр. Әкімдік жоспары бойынша, базардың орнына көлік-ауысу торабы салынуы үшін базардың өзін де сатып алу жоспарланып отыр екен. Еске салайық, биыл қарашада мәжіліс депутаты Сергей Пономарев Алматы метросының құрылысын жалғастыру үшін қомақты қаржы бөліп, бюджет кодексіне соған сай өзгеріс енгізуді ұсынған еді. Ол Instagram әлеуметтік желісінде видео жариялап, онда Алматы қаласы метросының құрылысын жалғастыру үшін 1 миллиард доллар бөлу жөнінде ұсыныс жасағаны туралы баяндады. "Үкімет кепілдігімен метро құрылысына 1 млрд доллар бөлінсін. Жоба не себепті маңызды? Себебі Алматыда қозғалу мүмкін емес. Біздегі метро емес, соқыршек қана. Президент метроның екі желісін салуды тапсырған. Әуежайдан "Барлық" базарына дейін. Оны жүзеге асыру үшін көп қаражат қажет", - деп мәлімдеген еді ол.

Метрополитен сайтындағы мәлімет бойынша, Алматы метросының құрылысы 1988 жылы басталған. Бірақ 1991 жылы КСРО-ның ыдырауы және содан кейінгі шарушылық және экономикалық байланыстардың тоқтап қалуы Алматы қаласы метрополитені құрылысының толық жүзеге асуына мүмкіндік бермеген. Бірқатар министрлік пен ведомствоның таратылуына байланысты көптеген сұрақтар шешілмей қалған. Содан 23 жыл өткенде, 2011 жылы 1 желтоқсанда жалпы ұзындығы 8,6 км болатын метрополитеннің бірінші кезегі іске қосылды. Оның құрамына "Райымбек батыр", "Жібек жолы", "Алмалы", "Абай", "Байқоңыр", "Әуезов театры" және "Алатау" бекеттері кіреді. Ал 2015 жылы 18 сәуірде метрополитеннің бірінші желісіндегі екінші кезектегі бірінші іске қосу кешенінің "Сайран" және "Мәскеу" бекеттері пайдалануға берілді. Метро тоннелінің ұзындығы 2,74 км-ге дейін созылды.