«Гүлден пайдалы»: Мәжіліс депутаты Дәулет Мұқаев әйеліне бір құшақ картоп сыйлады
Желі қолданушылары түрлі пікір қалдырды
Мәжіліс депутаты Дәулет Мұқаев әйеліне гүлдің орнына картоп букетін сыйлады. Қазіргі кезде мұндай сыйлықтың пайдалы екенін жазды, деп хабарлайды KYN.KZ ақпарат агенттігі.
Бұл туралы видеоны Мәжіліс депутаты Instagram-дағы парақшасында жариялады. Бейнежазбада картоптың гүл іспеттес етіп оралғанын көруге болады.
"Сәл-пәл романтикаға жақындығым бар енді. Әрі картоп қымбаттаған уақытта гүлден пайдалы болып тұр. Отбасымызбен жейміз", - деп жазды депутат бейнежазба сипаттамасында.
Желі қолданушылары мұндай сыйлықтың бағалы екенін жарыса жазуда. Ал кейбіреулері гүлдік орнын ештеңе баса алмайтынын айтты.
Олар "Қымбат ол букет негізі. Картоптың бағасы 370 теңге болып жатыр қазір", "Күшті идея екен. Өмір тым қысқа, әр сәтіміз бағалы", "Иә, рас, гүл емес картоп керек болып тұр дәл қазір маған да" деген пікірлер қалдырды.
Еске салсақ, Қазақстанда картоп бағасының күрт өсуіне байланысты үшінші елдерге картоп жөнелту уақытша тоқтатылды. Тиісті шешім 18 қаңтарда өткен Сауда қызметі мәселелері жөніндегі ведомствоаралық комиссия отырысында қабылданды.