Өмірлік қиын жағдайларға тап болған түлектер білім грантын өтеуден босатылуы мүмкін
Қыз-жігіттер магистратураны тәмамдаған соң екі жылдан кейін осы талапты орындай алады
Елімізде өмірлік қиын жағдайларға тап болған түлектер білім грантын өтеуден босатылуы мүмкін. Мәжіліс депутаттары мақұлдаған заң жобасына сәйкес бұл санатқа мүмкіндігі шектеулі бала тәрбиелеп отырған немесе I топтағы мүгедек адамды бағып отырған азаматтар кіреді, деп хабарлайды KYN.KZ ақпарат агенттігі Информбюро жаңалықтарына сілтеме жасап.
Сондай-ақ, өзгеріс енген құжатта жоғары білімін шетелдік оқу орындарында жалғастыратын жандарға міндетті еңбек өтеу мерзімі кейінге шегеріледі. Яғни, қыз-жігіттер магистратураны тәмамдаған соң екі жылдан кейін осы талапты орындай алады.
Оған қоса, халықаралық ғылыми жарыстардағы жеңістері үшін оқушылар мен оларды дайындайтын мұғалімдерге біржолғы төлемақы беру қарастырылады.
Ал 10-шы және 11-сынып оқушыларына мектеп пен колледжде қатар оқуға мүмкіндік берілмек.