Зеленский АҚШ тарапынан әскери көмектің тоқтатылуына байланысты пікір білдірді

Украина президенті Владимир Зеленский әртүрлі ведомстволардың басшыларын АҚШ-тан Киевке қатысты әскери көмек туралы ресми ақпарат алуға тапсырма берді, деп хабарлайды Kyn.kz УНИАН-ға сілтеме жасап.

Агенттіктің хабарлауынша, мемлекет басшысы бұл туралы украин халқына жасаған кешкі үндеуінде Telegram арнасында айтты.

Украин лидерінің айтуы бойынша, бүгінгі күні көпшілікте бір сұрақ бар: "Америкадан көмек жағы не болады?"

"Мен Украина қорғаныс министріне, біздің барлау қызметтерінің басшыларына, дипломаттарға АҚШ-тың тиісті органдарымен байланысып, ресми ақпарат алуды тапсырдым. Халық болжам жасап отыруы дұрыс емес. Ресми жауап айтылуы, нақтылануы керек. Украина мен Америка бір-біріне қарым-қатынасын диалог арқылы шешіп, позицияны ресми нақтылап алған жөн. Әсіресе, толық масштабты соғыс кезінде адам өмірін қорғау мәселесі сөз болғанда," – деді Зеленский.

Оның айтуынша, Украинада бірнеше апта бойы әртүрлі сигналдар алынды және көмек тоқтатылған прецеденттер болған.

"Гуманитарлық көмек, энергетикалық көмек тоқтатылды. Сондай-ақ, әскери көмек те тоқтатылды – қаңтардың соңында, бірақ сол кезде бәрін тез қалпына келтіруге мүмкіндік болды. Біз қауіпті көрдік. Сондықтан біздің қызметтер – әскери және арнайы қызметтер – жағдайдың кез келген өзгерісіне қарай әрекет ету алгоритмдерін әзірледі. Біздің тұрақтылығымыз жоғары. Бізде қорғаныс құралдары бар," – деді ол.

Президент Украина үшін "Америкамен қалыпты, тұрақты  серіктестік қатынастардың соғыстың нақты аяқталуы үшін маңызды" екенін атап өтті.

"Біздің ешқайсымыз шексіз соғысты қаламаймыз," – деп түсіндірді Зеленский.

Ол Украина Америкаға "берілген және беріліп жатқан, бүгінгі күні Еуропадағы өте нәзік қауіпсіздік негіздерін сақтау үшін жұмыс істейтін барлық қолдауы үшін" әрдайым алғыс білдіретінін айтты.

"Бұл тек біздің ел туралы емес. Бұл Еуропадағы барлығымыз туралы. Біз конструктивті ынтымақтастыққа, серіктестік қатынастарға ұмтыламыз," – деді президент.

Сондай-ақ, ол өткен аптада Вашингтонда Дональд Трамппен кездесу туралы айтты.

"Біздің келіссөздеріміздің орнына Ақ үйде не болғаны туралы тек өкініш білдіруге болады. Бірақ біз алға жылжу үшін күш табуымыз керек, бір-бірімізді құрметтеуіміз керек, біз әрдайым Америкаға, Еуропаға, барлық серіктестерге құрметпен қараймыз және бірге әлемді жақындату үшін барлығын жасауымыз керек. Украинаға қолдау көрсеткен барлық адамға алғысымды білдіремін," – деп қорытындылады Зеленский.