Қазақстан бойынша кімдер тісін тегін емдете алатыны айтылды

Қазақстанда шұғыл көмекке мұқтаж адамдар учаскелік дәрігерден жолдама алмай-ақ, тікелей стоматологиялық мекемелерге жүгіне алады, деп хабарлайды KYN.KZ ақпарат агенттігі Kazinform сайтына сілтеме жасап.

Елімізде шұғыл стоматологиялық көмек келесі санаттағы азаматтарға көрсетіледі:

• 18 жасқа дейінгі балалар;
• жүкті әйелдер;
• Отан соғысының ардагерлері;
• I, II және III топтағы мүгедектер;
• "Алтын алқа" және "Күміс алқа" алған көпбалалы аналар;
• атаулы әлеуметтік көмек алушылар;
• жасы бойынша шыққан зейнеткерлер;
• жұқпалы және әлеуметтік маңызы бар аурулары, сондай-ақ айналасындағыларға қауіп төндіретін аурулары бар пациенттер.
• мүгедектігі бар немесе бала кезінен I топтағы мүгедектігі бар балаға күтім жасайтын жұмыс істемейтін азаматтар.

Дәрігерден жолдама алмай-ақ келесі процедураларды алуға болады:

• күрделі кариесті, пульпитті, периодонтитті емдеу;
• күрделі тістерді, соның ішінде "ақыл" тістерді жұлғызу;
• абсцесстерді ашу және одонтогенді кисталарды жою;
• шыққан жақты орнына қою;
• қатерсіз өсінді-ісіктерді жою (мысалы, эпулис);
• жарақат алған кезде қозғалған тісті уақытша орнына келтіру;
• тіл жүгеншігі немесе ерін пластикасы.

Жоспарлы стоматологиялық көмек мыналарды қамтиды:

• профилактикалық тексерулер және тістерді тазалау;
• кариесті емдеу (композиттік материалдардан жасалған пломбаларды қолдана отыра);
• қарапайым және күрделі тісті жұлу;
• жүйкені (тіс ұлпасын) алып тастау;
• гингивит, стоматит және қызыл иектің басқа қабынуын емдеу.

Ортодонтиялық көмек жақ сүйегінің туа біткен ауытқулары бар (таңдай жырығы, тістеу қабілеті дұрыс жетілмеген) және тіс-жақ деформациялары бар 6 жастан 12 жасқа дейінгі аз қамтылған отбасылардан шыққан балаларға көрсетіледі.

Шұғыл көмек – кез келген уақытта жолдамасыз көрсетіледі. Жоспарлы көмек алу үшін тіс дәрігеріне жазылу қажет. Егер дәрігер емханада амбулаториялық жағдайда көмек көрсету мүмкін емес деп санаса, науқас жедел жәрдеммен ауруханаға жіберіледі.