Астана қаласының қоғамдық денсаулық сақтау басқармасы секс-жұмыскерлер арасында АИТВ-ның алдын алу бойынша 17 миллион теңгеден астам келісімшарттың мән-жайын түсіндірді, деп хабарлайды KYN.KZ ақпарат агенттігі Tengrinews.kz сайтына сілтеме жасап.

Естеріңізге сала кетейік, бұған дейін Астана қаласының қоғамдық денсаулық сақтау басқармасы 17 106 607 теңге қаражатты  «жезөкшелер арасында АИТВ-ның алдын алуға бағытталған іс-шаралар ұйымдастыру және өткізу» туралы шарт жасасқаны анықталған. 

Басқарма секс-жұмыскерлерді дербес есепке алу жүргізілмейтінін түсіндірді. Тек профилактикалық іс-шаралар барысында алынған деректер жазылады. Бірақ анонимдік пен құпиялық жеке кодтау жүйесі арқылы қамтамасыз етіледі.

Деректерді жинау жылжымалы сенім пункттерінің, АИТВ-инфекциясының алдын алу орталығы мамандарының рейдтерінің көмегімен жүзеге асырылады. Презервативтер мен кеңес беруден басқа, тәуекел тобындағы адамдарға антиретровирустық профилактика ұсынылады.

Басқарма 2022 жылдан бастап АИТВ-ның алдын алу бойынша ҮЕҰ-мен шарттар жасасады. Жалпы, мұндай іс-шараларды мемлекет 1997 жылдан бастап халықаралық ұйымдардың қолдауымен қаржыландырады. Бұл АИТВ-ның таралуының алдын алуға мүмкіндік береді.

Соңғы жылдары АИТВ-ның қорғалмаған жыныстық қатынас арқылы таралу үрдісі жоғарылады. Бұл жүкті әйелдер мен олардың балаларына вирустың таралу қаупін арттырады.

Сондай-ақ ведомствоның жауабында ҚР «Халық денсаулығы және денсаулық сақтау жүйесі туралы» кодексінің 99-бабына сәйкес АИТВ-ның алдын алу мемлекеттік әлеуметтік тапсырыстар мен гранттар арқылы қаржыландырылатыны айтылған. Жергілікті денсаулық сақтау органдары осындай бағдарламалардың іске асырылуын қалыптастыруға, мониторингтеуге және бағалауға міндетті.

Мемлекет қоғамдық денсаулықты қорғау және ЖИТС-тен болатын өлімді азайту мақсатында әлеуметтік маңызы бар аурулардың, оның ішінде АИТВ-инфекциясының алдын алу, диагностикалау және емдеуді қаржыландыру бойынша міндеттемелерді өзіне алады.