Шерзат Полат өлімі: сотталушылар бұған дейін де сотты болғаны белгілі болды
Сотталушылардың бірі ақпанда ғана тергеу изоляторынан үй қамаққа шыққан
Талғарда төбелес кезінде қаза болған 16 жастағы Шерзат Полаттың өліміне байланысты сотта сотталушылардан жауап алу жалғасып жатыр. 16 мамырдағы процесте айыпталушы Азамат Тоқтаубаевтың бұған дейін сотты болғаны айтылды, деп хабарлайды KYN.KZ ақпарат агенттігі ulysmedia.kz сайтына сілтеме жасап.
«2023 жылы 4 желтоқсан күні мені күдікті деп танып, 106-баптың 1-тармағымен (Денсаулыққа қасақана ауыр зиян келтіру) маған екі ай санкция берген. Мені уақытша ұстау изоляторына, Талдықорған қаласының N71 мекемесіне жапты», – деді Тоқтаубаев сотта прокурорға берген жауабында.
Азамат Тоқтаубаев ақпанда ғана тергеу изоляторынан үй қамаққа шыққан. Өзінің айтуынша, тағылған айып 106-баптың 1-тармағынан 2-тармағына ауыстырылған.
Шерзат Полаттың өліміне қатысты істе Азамат Тоқтаубаевқа ҚК 293-(Бұзақылық) және 188-баптары (Ұрлық) бойынша айып тағылған.