Шерзат Полаттың өліміне қатысты сотта айыпталушылар соңғы сөздерін сөйледі. Азамат Тоқтаубаев анасына өлең шумақтарын арнады, деп хабарлайды KYN.KZ ақпарат агенттігі.

Тоқтаубаев соңғы сөзінде ендігіде өмірге деген көзқарасы өзгергенін айтып, қателеспейтін адам жоқ екенін алға тартты.

“Менің мінездемемде де көрсетілген. Менде ешқашан бұзақылық ниет болмаған. Бір үйден екі азамат кетіп, сотталайын деп отыр. Әке-шешемізге де обал, бала-шағамыз жетім қалды. Асыраушысы едік. Балалы болып ата-анамның қадірін біліп жатырмын. Бұрын-соңды істі болдым. Басыма тиді. Енді өмір сүруге көзқарасым бөлек! Қазір жағдайымды ойлаймын. Тек алға! Өмір тоқтаған жоқ. Түзеліп шыққасын өзгеремін. 7 жыл, 15 жыл деп жатыр. Бұл маған ауыр тиеді. Өзімді қоғамға қауіптімін деп есептемеймін. Қателеспейтін адам жоқ!”, – деді ол. 

Сондай-ақ ол судьядан жазасын 7 жыл 2 ай мерзіміндле қалдыруды сұрады. Сөзінің соңында анасына өлең жолдарын арнады.

“Анашым кешіріңіз бізді!

“Анашым амал барма мына сорға,

Бүркіт ем аспанда ұшқан түстім торға”, – деп оқыды.