Елімізде енді азаматтар әскерге онлайн шақыртылатын болады: Тоқаев заңға қол қойды
Қазақстанда әскерге шақыру қағаздары SMS-хабарлама немесе eGov порталы арқылы да жіберіледі.
Енді мерзімді әскери қызметке шақырылатын қазақстандықтар шақыру қағазын тек қағаз жүзінде ғана емес, сонымен қатар электронды түрде — SMS арқылы және eGov порталындағы жеке кабинетіне де алатын болады, деп хаюардайды KYN.KZ ақпарат агенттігі.
Президент «Әскери-патриоттық тәрбие, әскери қызмет және жекелеген орталық мемлекеттік органдардың функцияларын қайта бөлу мәселелері» жөніндегі өзгерістерді бекітті.
Жаңа заңға сәйкес, әскерге шақыру қағаздары SMS-хабарлама немесе eGov порталы арқылы жіберіледі.
Сонымен қатар, мерзімді әскери қызметтен өткендер екі жыл ішінде ҰБТ мен емтихансыз ақылы негізде жоғары оқу орындарына немесе магистратураға түсе алады.
Шақырылушы медициналық тексеруден өту, комиссия жұмысына қатысу немесе әскери бөлімге аттану үшін көрсетілген күні мен уақытта әскери комиссариатқа келуге міндетті.
Шақыру қағазы мынадай жолдармен берілуі мүмкін:
• SMS-хабарлама арқылы;
• eGov порталындағы жеке кабинетке;
• немесе бұрынғыдай қағаз түрінде — егер цифрлық арналар қолжетімсіз болса.
Электронды шақыру кемінде үш күн бұрын жіберілуі тиіс.
Қағаз нұсқадағы шақыру азаматқа қолма-қол табысталады немесе пошта арқылы жіберіледі.
«Егер әскери қызметке шақырылатын азамат қағаз нұсқадағы шақыруды қабылдаудан бас тартса, оны тапсырушы тиісті белгі қояды. Бұл шақыру жергілікті әскери басқару органына қайтарылады. Шақырудан бас тартқан азамат тиісті түрде хабарланған болып есептеледі», - делінген хабарламада.
Қажет болған жағдайда, шақыру қағазы әскери комиссариаттың өзінде де табысталуы мүмкін — бұл жағдайда келесі күні келуге тура келеді.