Алматы қаласында дәрігердің екпесінен кейін әйел есінен танып, комаға түсіп қалған, деп хабарлайды KYN.KZ тілшісі.

№28 емханасына әйел өкпе қабыну диагнозы бойынша барған. Дәрігер арнайы аллергияға қарсы сынама алмастан бұрын дәрі еккен.

Бұл туралы журналист Руслан Өтепбай зерттеу жүргізіп, емхана басшылығы мен комада жатқан әйелдің күйеуінен сұхбат алды.

“Жағдайы ауыр. 15 минутқа жүрегі тоқтап қалған. Клиникалық өлім болған. Система салдыруға барған. Сол система салдырғанда уколға аллергия берді”, — дейді Толқынның күйеуі.

 Дәрігерлер әйелге “Цеф-3” екпесін салғанын айтқан. Бірақ жәбірленушілердің сөзінше, дәрігерлер науқасқа “проба салдық” деп өтірік айта салған. Сараптамадан кейін, оның жалған екені анықталған.

“Бұл жағдайға байланысты отбасының уайымын түсінеміз. Арнайы сараптама жасалды. Құзырлы органдарға берілді. Біз бұл шешім туралы түсініктеме беруге құқымыз жоқ. Себебі, дәрігерлік құпия дегенге байланысты деректерді тарата алмаймыз. Емхана жұмысын жалғастыруда. Әжібекова Толқынға біздің тарапымыздан барлық көмек көрсетілуде. Күндізгі стационардың дәрігері системаны тағайындаған. Анамнездің бәрін алып барып, дәріні берген”, — деді емхана бас директоры Назгүл Асанова.

Дәріні тағайындаған дәрігер науқастың аллергияға қатысты шағымы болмағанын айтты.

«Бронхит, өршу сатыс»  диагнозы қойылып, соған байланысты ем тағайындалды. Анамнезін, шағымдарын жинағанда, “ешқандай аллергиям” жоқ деді. Не тағайындап жатқанымды айттым. Ақпараттық келісімге қол қойды», - дейді емхананың дәрігері.