Тағы да сол дәрігер: Астанада 59 жастағы әйел мұрнына ота жасатқаннан кейін көз жұмды
Астанада мұрнына ота жасатқан әйел қайтыс болып кетті.
Астанадағы жеке клиникада мұрын пердесін түзету бойынша жоспарлы операциядан кейін 59 жастағы әйел қайтыс болды, деп хабарлайды KYN.KZ ақпарат агенттігі.
Ақтаудың 59 жастағы тұрғыны 2025 жылғы 3 маусымда септоринопластика бойынша жоспарлы операциядан кейін көз жұмды. Марқұмның ұлының айтуынша, анасының тыныс алуы қиын болған соң, хирургиялық араласу қажет болған.
Оның сөзінше, операцияны бұрын 22 жастағы қызға риносептопластика жасап, оның алты айлық комаға түсуіне себеп болған сол дәрігер жүргізген. Ұлы дәрігерді өз кәсіби міндеттерін тиісінше орындамауының салдарынан адам өліміне әкелгені үшін қылмыстық жауапкершілікке тартуды талап етуде.
Денсаулық сақтау министрлігінің Медициналық және фармацевтикалық бақылау комитетінің департаментінде хабарлағандай, 2025 жылғы 10–16 шілде аралығында жеке клиникаға жоспардан тыс тексеру жүргізілген.
Анықталғандай, 3 маусымда операция жүргізілген кезде клиниканың медициналық қызмет көрсетуге лицензиясы болмаған.
«2025 жылғы 20 наурыз бен 3 маусым аралығында кеңес беру және операциялық араласулар кезінде “Medina Plastic Surgery” ЖШС-нің келесі мамандықтар бойынша медициналық қызметке мемлекеттік лицензиясы болмаған: пластикалық хирургия, анестезиология және реаниматология, нейрохирургия, ересектерге стационарлық көмек көрсету», – деп хабарлады ведомство.
Клиникаға мемлекеттік лицензия тек 2025 жылғы 17 маусымда, пациент қайтыс болғаннан кейін берілген.
«Пациентке сапасыз медициналық көмек көрсету фактісі бойынша өтініш департаментке 2025 жылғы 3 шілдеде, лицензия берілгеннен кейін түсті. Осылайша, департаментке пациенттің өлімі туралы өтініш түскенге дейін хабарланбаған», – делінген хабарламада.
Осыдан кейін департамент 2025 жылғы 28 тамызда “Medina Plastic Surgery” ЖШС-нің лицензиясын тоқтатты.
Тексеру нәтижелері бойынша материалдар құқықтық баға беру және процессуалдық шешім қабылдау үшін Астана қаласы полиция департаментіне жолданған.
Бұған дейін біз Астанадағы жеке клиникада риносептопластикадан кейін алты айлық комаға түскен 22 жастағы қыз туралы жазған болатынбыз. Сапасыз медициналық қызмет көрсету фактісі бойынша полиция қылмыстық іс қозғаған.