Қазақстандықтар зейнетақы қаражатын көз ауруларын емдетуге пайдалана бастаған
Қазақстанда офтальмологиялық ауруларды емдеу үшін зейнетақы жинақтарын пайдалану жөнінде 15,4 мың өтініш берген.
Қазан айында қазақстандықтар офтальмологиялық ауруларды емдеу үшін зейнетақы жинақтарын пайдалану жөнінде 15,4 мың өтініш берді. Олардың жалпы сомасы 13,3 млрд теңгені құрады, деп хабарлайды KYN.KZ ақпарат агенттігі Бірінші кредиттік бюроға сілтеме жасап.
Бұл көрсеткіш қыркүйекпен салыстырғанда 10 есеге жуық, ал 2025 жылдың қаңтар-тамыз айларындағы орташа деңгейден 73 есеге жоғары болды. Бұған дейін көз емдеуге байланысты жалпы төлемдер көлемі бір айдағы қазіргі нәтижеге әрең жеткен еді.
Төлемдердің күрт артуы қыркүйекте күшіне енген стоматологиялық емге зейнетақы жинағын пайдалануға тыйым салумен байланысты. Осыған дейін емге берілген төлемдердің басым бөлігі тіс емдеуге арналған болатын.
«Қазанда стоматологиялық мақсаттағы өтініштер орындалған жоқ, алайда бұрын берілген өтініштер бойынша қаражатты қайтару жалғасты», – деп атап өтті бюро.
Қаражатты қайтару өтініш беруші шешімін өзгерткен, құжат тапсырмаған немесе қаражатты мақсатсыз пайдаланбақ болған жағдайларда жүргізіледі. Көз ауруларын емдеуге байланысты да мұндай жағдайлар тіркелген. Бұл – 730 млн теңге болатын 901 өтініш немесе қазан айындағы жалпы төлемдердің шамамен 6%-ы.
Зейнетақы жинағын тұрғын үй жағдайын жақсартуға пайдалану да белсенді түрде жалғасуда:
- 138,4 мың өтініш орындалды (+7%),
- жалпы сома – 79,9 млрд теңге (+9%).
Тұрғын үйге байланысты қаражат қайтару да қалыпты деңгейде – 12,6 млрд теңгеге 16,3 мың өтініш.