Синоптиктер алдағы үш күнге яғни 24-26 қаңтарға арналған ауа райы болжамын ұсынды, деп хабарлайды KYN.KZ ақпарат агенттігі  "Қазгидромет" РМК-ға сілтеме жасап.

Метеорологтардың мәліметінше, Атлантика аймақтарынан жылжып келе жатқан циклон мен белсенді атмосфералық фронттар әсерінен алдағы күндері Қазақстанда қар, оңтүстік өңірлерде жауын-шашын (жаңбыр, қар), боран, желдің күшеюі күтіледі.

Циклон ел аумағы арқылы ілгерілеген сайын, территорияның едәуір бөлігіне жылырақ ауа массаларының енуі басталады, соның нәтижесінде ауа температурасы біртіндеп жоғарылайды:

• түнгі уақытта орталық және шығыс өңірлерде -5…-18°С-қа дейін;
• оңтүстік-шығыста -2…-7°С-қа дейін;
• таулы аудандарда -7…-15°С-қа дейін көтеріледі.
• Солтүстік облыстарда түнде ауа температурасы -20…-35°С шамасында болып, аязды күн сақталады.

Сонымен қатар суық арктикалық ауа шоғырланған антициклон жотасы елдің батыс өңірлеріне таралып, түнгі уақытта ауа температурасының -15…-30°С-қа дейін, ал солтүстік-батыста -20…-35°С-қа дейін төмендеуіне себеп болады.