Алматыда жылу құбыры жарылды: төрт адам күйік алып, үшеуі ауруханаға жеткізілді

Алматыда жылу құбыры жарылып, қайнаған су жеке сектордағы үйлерді басты. Төтенше жағдай салдарынан төрт адам күйік алып, үшеуі ауруханаға жеткізілді. Зардап шеккен тұрғындар келтірілген шығынды өтеп, ескі жылу желілерін толық ауыстыруды талап етіп отыр, деп хабарлайды KYN.KZ ақпарат агенттігі КТК телеарнасына сілтеме жасап.

Алматыда жылу құбырындағы апаттан зардап шеккен тұрғындар өтемақы талап етіп жатыр. Өткен демалыс күндері құбыр жарылып, жеке секторды қайнаған су басты. Су тіпті үйлердің ішіне кірген. Төрт адам күйік алып, олардың үшеуі қазір ауруханада жатыр. Коммуналдық қызметтер төтенше жағдайдың салдарын үшінші күн қатарынан жоюға тырысып жатыр. Юрий Сидоров өз үйіне кіруге қорқып жүр. Су тасқынынан кейін қабырғаларда жарықтар пайда болған. Ол үшінші күннен бері жиһазын кептіруге тырысып жатыр. Ер адамның айтуынша, барлық бөлмелерді қайнаған су басқан.

"Су – қайнаған. Қолдан келгенше сыртқа шықтық. Галош киіп, шелектермен шықтық. 

Шелекпен болса да осы жерден қашып шығуға мүмкіндік болды. Үй сытыр-сытыр етеді. Ұйқыдан оянғанда, ең бастысы, құлап кетпесе екен деп ойлайсың. Құтқарушылар бізді эвакуациялаған кезде "Үйде тұруға болмайды, құлап қалуы мүмкін" деп ескертті", – деді Юрий Сидоров.

Коммуналдық апат сенбіге қараған түні Алматының шетінде болған. Жылу құбыры жарылып, ыстық су тұрғын үйлерге лап қойған. Қорыққан адамдар далаға жүгіріп шыққан. Төрт адам күйік алып, үшеуі ауруханада жатыр. Зардап шеккен тұрғындардың бірі Наталья Харламова апат кезінде үйіне қайнаған су қалай кіргенін еске алды.

"Сағат 02:50-де үйге қайнаған су құйылып жатқанын сезіп ояндым. Үйді су баса бастады. Қорыққаннан далаға әрең жүгіріп шықтым. Әйтеуір баспалдаққа, биігірек жерге шығып алдым. Іргетасты шайып кетті, қабырғалар бүлінді. Жатар жер жоқ, матрастардың бәрі су", –деді Наталья Харламова.

Олеся Дорошкеева да сол түнді қорқынышпен еске алады. Оның үйін де түгел қайнаған су басқан. Әйел қарт анасын құтқаруға ұмтылып, сол кезде аяқтарын күйдіріп алған.

"Ауырсынуы өте қатты. Қайнаған суға түскендей, қазанға түсіп қайнағандай күй кештім. Төменгі қабатта қарт анам бар еді. Қайнаған су басып қалды ма деп қорқып, соған жүгірдім. Сол жерде қайнаған су еді. Үйдің айналасын қайнаған су қоршап, біз қамалып қалдық, шыға алмадық. Ештеңе көрінбейді, тек еңкейгенде ғана бірдеңе байқалады", – деді Олеся Дорошкеева.

Үй иелері шығындарын есептеп жатыр. Жөндеу, жиһаз бен техника толық жарамсыз болып қалған. Жергілікті тұрғындардың айтуынша, бұл жерде коммуналдық апат екінші рет қайталанып отыр.

"2020 жылы көшенің тек 20%-ын ғана жөндеді, ал құбырларды толық ауыстыруға тиіс еді. Олар жиі жарылып тұрады. Міне, мынау екінші оқиға. Мұны толық, күрделі жөндеу керек. Әзілдеп тұрған жоқпыз. Салқын су болса бір жөн, ал бұл 80 градус қайнаған су", – деді тұрғын Анна Гришина.

Белгілі болғандай, жергілікті құбырға 55 жыл болған. Желілердің әбден тозғанын коммуналдық қызметтің өзі де мойындайды. Апаттан кейін жұмысшылар құбырдың бір бөлігін ауыстырған. Компания тұрғындарға келтірілген залалды өтейміз деп уәде берді.

"Зақымданған құбырдың диаметрі 800 миллиметр. Ақау анықталғаннан кейін кәсіпорын қызметкерлері жедел шаралар қабылдады. Жарылу оқшауланып, сол күні бес сағат ішінде жойылды. Біздің заңгерлер үй-үйді аралап, зақымдарды тіркеді. Енді бағалау жүргізіледі", – деп пікір білдірді "Алматы жылу желілері" ЖШС ресми өкілі Наталья Инкина.

Өтемақы мөлшері бағалау нәтижесіне қарай анықталады. Алайда тұрғындар өз өмірлері үшін көбірек алаңдайды. Олар ескі құбырлар тағы жарылып кетуі мүмкін деп қорқады. Сондықтан желілерді толық ауыстыруды талап етіп жатыр.