Ақтөбеде қуаттағыш құрылғы (пауэрбанк) жарылып, бір отбасының үйі өртеніп кетті. Отбасы құрылғыны сол күні қуаттауға қойып қойған, деп  хабарлайды KYN.KZ ақпарат агенттігі Алматы арнасына сілтеме жасап. 

Қазір Тимур Майрумбаевтың үйінен тек күйген қабырғалар ғана қалған. Мұнда есіктер сынған, ішін түтін басып, өрттің иісі қалған. Оқиға өткен сенбіде 28 ақпан күні болған. Тимур сол жерде екі ұлы мен әкесімен тұрған.  

"Сырттан "пах" деген жарылысты естідім. Қарасам, ұлымның бөлмесінде немерелеріміз қуаттағыш құрылғыны элетр тогына қосып қойған екен. Содан өрт шықты. Жарылыс, түтін басталды. Бірден шкаф жанып кетті. Дем алу мүмкін болмады. Ештеңе көрінбеді. Құдай сақтасын, мұндай өрт болмасын. Жалпы, мұны қосуға мүлде тыйым салу керек, әсіресе балаларға", – деді Тимурдың әкесі Құрман Майрумбаев.

Кейін өрт сөндірушілер бірнеше минутта жеткен. Бірақ үйді құтқару мүмкін болмаған.

"28 ақпанда Ақтөбе қаласындағы "Арман" тұрғын үй кешенінде бір қабатты жеке тұрғын үйдің шатырында өрт шықты. Өрт сағат 20:02-де локализацияланып, 20:23-де толық сөндірілді. Қаза болғандар мен зардап шеккендер жоқ", – деп хабарлады Ақтөбе облысы ТЖД баспасөз қызметі.

Құтқарылған тек құжаттар ғана болды. Оқиға болған соң отбасы туысына қоныс аударған. Қазір жаңа үй іздеуде. Ер адам өз қолымен 6 жыл бойы тұрғызған үйді енді нөлден қалпына келтіруі қажет.

"Мен өзім құрылысшымын. Қазір маған тек құрылыс материалдары қажет. Ауа райы жылынса, қалай қалпына келтіру керегін ойланамын. Мүмкін қабырғаларды сүзіп, қайта тұрғызуға тура келеді. Мен осы үйді өзім тұрғыздым, ешкім көмектеспеген", – деді Тимур Майрумбаев.

Биыл осы аптада отбасы үйдің аумағын қоқыстан тазалауды бастайды. Мұндай жағдайлардың алдын алу үшін қуаттағышты аса сақтықпен қолдану керек. Ал ақаулар пайда болса оны телефонға немесе қуат көздеріне қосуға қатаң тыйым салынған.