Андрей Казанцев: Жаңа Конституция – 2019 жылдан бері жүргізіліп келе жатқан саяси және институционалдық өзгерістердің нәтижесі
Қазақстандағы конституциялық реформа елдің өнімділіктің өсуіне, технологиялық жаңғыртуға және адами капиталды нығайтуға негізделген жаңа даму моделіне көшуін көрсетеді.
Мұндай пікірді Орталық Азия бойынша маман, профессор Андрей Казанцев Қазақстан Республикасының Президенті жанындағы Қазақстан стратегиялық зерттеулер институты (ҚСЗИ) мен Maqsut Narikbayev University (MNU) бірлесіп ұйымдастырған «Қазақстанның жаңа конституциялық моделі: орнықты әрі заманауи мемлекет жолында» атты халықаралық сарапшылардың дөңгеле үстелінде білдірді.
Сарапшының айтуынша, жаңа Конституцияны қабылдауды 2019 жылдан бері Қазақстанда дәйекті түрде жүзеге асырылып келе жатқан саяси және институционалдық өзгерістердің кең ауқымды контекстінде қарастыру қажет.
Ол соңғы жылдары елдің елеулі құрылымдық трансформациядан өткенін, Орталық Азиядағы ең ірі экономика ретіндегі позициясын нығайтып, тұрақты экономикалық өсім көрсеткенін атап өтті.
Сонымен қатар Казанцевтің бағалауынша, Қазақстанның даму стратегиясы біртіндеп өзгеріп келеді.
«Қазақстан біртіндеп негізінен сандық экономикалық өсімге бағытталған модельден өнімділіктің артуына, технологиялық жаңғыртуға және адами капиталды нығайтуға негізделген сапалы даму моделіне өтуде»,
– деді сарапшы.
Оның айтуынша, мұндай модельді жүзеге асыру тек экономикалық реформаларды ғана емес, сонымен қатар ұзақ мерзімді мемлекеттік саясатты үйлестіре алатын және құрылымдық экономикалық өзгерістерді қолдайтын тиімді басқару институттарын талап етеді.
Осы тұрғыда жалпыұлттық референдумда мақұлданған конституциялық реформа ел дамуының жаңа кезеңі үшін институционалдық негіз қалыптастырып, мемлекеттің ұзақ мерзімді тұрақты дамуды қамтамасыз ету қабілетін күшейтеді.
Сарапшы сондай-ақ басқару институттарының нығаюы қоғамның мемлекеттік институттарға деген сенімін арттыруға, инвестициялық ахуалды жақсартуға және Қазақстанның өңірлік әрі жаһандық экономикадағы рөлін күшейтуге ықпал ететініне назар аударды.
Қорытындылай келе, Казанцев конституциялық реформаның елді жаңғыртудың кең ауқымды стратегиясымен және Қазақстанның ұзақ мерзімді даму бағытын қалыптастырумен тығыз байланысты екенін атап өтті.