Перизат Қайраттан тәркіленген Mercedes-Benz S 450 мемлекет меншігіне өтті, деп хабарлайды KYN.KZ ақпарат агенттігі.

Бұл ақпарат  7 сәуірде электрондық саудада пайда болды. Сотталған Перизат Қайратқа тиесілі болған Mercedes-Benz S 450 автокөлігі мемлекеттік органдардың меншігіне берілген.

"Мүлікті мемлекеттік заңды тұлғалардың теңгеріміне беру және бекіту. Сауда-саттық мәртебесі: Өтті", - делінген порталдағы хабарландыруда.

Құжаттамаға сәйкес, автокөліктің аккумуляторы отырып қалған, сондықтан оның техникалық жай-күйін тексеру мүмкін болмады. Көлікпен бірге Pandora дабылы бар кілт беріледі.

Көліктің іші ақ былғарымен қапталған.

Көліктің бағалау құны шамамен 79,4 миллион теңге болады. Сондай-ақ автокөлікке тыйым салу түрінде шектеу қойылғаны атап өтілген.