Астанада жалаңаш ер адам балалар алаңында пышақпен жүгірді

Астанада ер адам жалаңаш күйде балалар алаңындағы бүлдіршіндерді шошытқан, деп хабарлайды KYN.KZ ақпарат агенттігі.

Петрова көшесі, 2-мекенжайындағы тұрғын үй ауласында 39 жастағы ер адам қолына пышақ ұстап алып, алаңда жүгірген. Айналасындағыларға айғайлап, балаларға “Сені пышақтап тастаймын!” деп қоқан-лоққы көрсеткен.

Шошынған ата-аналар мен балалар жан-жаққа қашып, тұрғындар дереу полиция шақырған. Құқық қорғау органдары шамамен 20 минуттан кейін келіп, ашулы ер адамды ұстады. Абырой болғанда, балалардың ешқайсысы зардап шеккен жоқ.

Полицияның мәліметінше, ұсталған адам Алматы аудандық полиция басқармасына жеткізілген. Сот оны ұсақ бұзақылық жасағаны үшін кінәлі деп танып, 20 тәулікке әкімшілік қамауға алған. Әзірге оның мұндай әрекетіне не себеп болғаны белгісіз.