7,7 миллиард теңге: "Болашақ" бағдарламасы бойынша стипендиялар басқа тұлғаларға беріліп келген
Министрліктің шешімімен жеке тәртіппен 340 үміткерге 7,7 миллиард теңге көлемінде стипендия тағайындалған.
Қазақстанда "Болашақ" бағдарламасы бойынша стипендиялар қойылатын талаптарға сәйкес келмейтін тұлғаларға беріліп келген. Бұл туралы Мәжілістегі үкімет сағатында Жоғары аудиторлық палатаның (ЖАП) мүшесі Тілеген Қаскин мәлімдеді, деп хабарлайды KYN.KZ ақпарат агенттігі Tengrinews.kz тілшісі.
Оның айтуынша, соңғы бес жылда Қазақстанда жоғары білім беру жүйесіне жұмсалатын шығыстар 246 миллиардтан 472 миллиард теңгеге дейін өскен. Студенттер контингенті 625 мың адамға жетті, мемлекеттік білім беру тапсырысының көлемі – 77 мыңнан астам грант.
"Жүргізілген мемлекеттік аудит қаржыландырудың екі есе өсуіне қарамастан, жоғары білім беру жүйесі сапаның, ашықтық пен нәтижеліліктің сәйкес деңгейде артуын қамтамасыз етпей отырғанын көрсетті. Бұл бірқатар жүйелі мәселеге байланысты", - деді Тілеген Қаскин.
Осындай мәселелердің бірі – "Болашақ" білім беру бағдарламасын әкімшілендіру.
"Іріктеудің жалпы критерийлеріне сәйкес келмегеніне қарамастан, министрліктің (ғылым және жоғары білім – ред. ескертпесі) шешімімен жеке тәртіппен 340 үміткерге 7,7 миллиард теңге көлемінде стипендия тағайындалған. 151 стипендия бекітілген лимиттен тыс берілген", - деді ЖАП мүшесі.
Ол жасанды интеллект блогына жеке тоқталды: палата деректері бойынша, жоспарланған 54 стипендияның іс жүзінде тек 5-еуі ғана тағайындалған, қалған 49-ы басқа бағыттарға қайта бөлінген.