Сұлтан Сәрсемалиев 4 адамды не себепті айуандықпен өлтіргенін айтты
Ол өлім жазасына да дайын екенін мәлімдеді.
Төрт адамды аяусыз өлтірді деп айыпталған Сұлтан Сарсемалиев жасаған қылмысының себебі ретінде ұзаққа созылған отбасылық жанжал мен психологиялық қысымды атады. Бұл туралы 18 мамыр күні Атырауда өткен атышулы іс бойынша алдын ала сот отырысында белгілі болды, деп хабарлайды KYN.KZ тілшісі Tengrinews.kz сайтына сілтеме жасап.
Алдын ала тыңдау барысында айыпталушы өз мәлімдемесін жасап, төрт бірдей отбасы мүшесінің өліміне әкелген жанжалдың өз нұсқасын баяндады. Еске салайық, Сұлтан Сарсемалиев қаза тапқандардың күйеу баласы болған.
«Мен жасаған қылмыстарым үшін жауапкершілік көтеруге, қандай жаза тағайындалса да — мейлі өлім жазасы болсын, мейлі өмір бойына бас бостандығынан айыру болсын — дайынмын. Барлық әрекетімнің басты себебі — маған және отбасыма қарсы жасалған, некемді бұзуға бағытталған әрекеттерге қасақана жауап беруім болды», — деді сотталушы.
Сарсемалиевтің айтуынша, жанжал отбасылық келіспеушіліктер мен жұбайының туыстарының араласуынан басталған.
«Біз әйеліммен 10 жыл бірге тұрдық. Егер арамызда үлкен түсініспеушілік болса, бес баламыз дүниеге келмес еді және сонша уақыт бірге өмір сүрмес едік. Алайда әйелімнің отбасы біздің қарым-қатынасымызға шектен тыс әрі негізсіз араласып, арамызға іріткі салды», — деді ол.
Айыпталушының сөзінше, жанжалдарға қарамастан, олар жұбайымен бірге өмір сүруді жалғастырған. Бірақ әйелінің туыстары тарапынан қысым тоқтамаған.
«Олар “балалар сенімен де, ата-анаңмен де қалмайды” деп айтты. Осылайша балаларымды пайдаланып, мені бопсалады», — деді ол.
Оның айтуынша, жиналған жағдайлар қатты эмоционалдық әрі психологиялық күйзеліске алып келген.
«Мен балаларымды анасынан да, әкесінен де, туған әжесінен де айырғым келмеді. Бірақ ақырында отбасымды сақтап қалуға деген барлық талпынысым таусылды. Олардың әрекеттері мен сөздері мені өз-өзімді ұстай алмайтын жағдайға жеткізді, моральдық әрі психологиялық тұрғыдан титықтатты. Соның салдарынан бұл қылмысқа бардым», — деді айыпталушы.
Бұған дейін сотта прокурор айыптау актісін оқып, оқиғаның мән-жайын егжей-тегжейлі баяндаған болатын.
Алдын ала сот отырысы — тараптар іс материалдарымен танысып, процессуалдық мәселелерді талқылайтын және істі сотта қарау тәртібі анықталатын кезең.