"Өлген адамды тірілткендей әрекет жасаған": Атырауда кісі қолынан қаза тапқан марқұмдардың туыстары сотта сөйледі
Марқұмдардың туыстары олардың жоғалып кеткендерін қалай біле бастағандарын айтты.
Сұлтан Сәрсемәлиевке қатысты сотта марқұмдардың туыстары жоғалған адамдармен емес, олардың атынан басқа біреумен хат жазысып отырғандарын қалай біртіндеп түсінгенін айтып берді, деп хабарлайды KYN.KZ тілшісі "Ақ Жайық" басылымына сілтеме жасап.
Бүгін Атырау облысының қылмыстық істер жөніндегі мамандандырылған ауданаралық сотында Жангелдин ауылындағы отбасының өліміне қатысты іс бойынша куәгерлерден жауап алу жалғасты.
Марқұм Мақсот Қарабалиннің немере қарындасы Паризат Кенжеғалиева өткен жылдың 12 қарашасында ағасының малы мен мүлкі сатылып жатқанын естіп, оның үйіне барғанын айтты. Сол жерде ол малды тиеп жатқан адамдарды көріп, сатылымды тоқтатуға тырысқан.
Оның сөзінше, бұл жағдай туралы ол Наурыз Мұқанғалиевтің WhatsApp нөмірі арқылы білген. Ол кезде әйел хабарламаларды басқа біреу жазуы мүмкін деп күдіктенбеген.
Куәгер үй иелері жоқ кезде мүліктің сатылуына үзілді-кесілді қарсы болғанын айтты. Осыдан кейін ол Наурызға бірнеше рет видеоқоңырау шалуға тырысқан, алайда ешкім жауап бермеген.
Жауап алу кезінде Кенжеғалиева айыпталушының әрекетіне эмоциясын жасыра алмады.
"Ол өлген адамды тірілткендей әрекет жасаған", – деді ол.
Кейін ол Сұлтан Сәрсемәлиевке қарата сөз айтты.
"Олардың кінәсі не еді? Басыңды көтер!" – деді куәгер.
Судья ескерту жасағаннан кейін куәгер жауабын жалғастырды. Оның айтуынша, марқұмдардың отбасында қарыз болмаған, олар өз еңбегімен күн көрген. Осы сөздерді айтқан кезде әйел жылап жіберді.
Одан кейін марқұм Мақсот Қарабалиннің немере інісі Шалқар Мұқанғалиевтен жауап алынды.
Ол туыстары жоғалғаннан кейін Наурыз Мұқанғалиевпен бірнеше рет байланысуға тырысқанын айтты. Хабарламалардың біріне "қиындықтар болып жатыр, анам ауырып қалды" деген мазмұнда жауап келген.
Кейін Мақсот Қарабалин мен оның жұбайы Нәсіп Өтешқалиева із-түзсіз жоғалғандар қатарында болған кезде, Шалқар WhatsApp арқылы Наурызға тағы да хат жазып, не болғанын түсінгісі келген.
Алайда бұл жолы жауап болмаған.
Куәгердің айтуынша, уақыт өте келе хабарламалардың өзі күдік тудыра бастаған.
"Наурыз әдетте қате жазатын. Ал мұнда хат жазу мәнері мүлде басқа болды", – деп түсіндірді ол сотта.
Мұқанғалиев сотта айыпталушыға да үн қатты.
"Алла кешірімді. Егер адам шын жүректен өкінсе, Алла кешіреді. Бірақ сен ата-анаңа, бес балаңа, Ақбаянның туыстарына және бізге үлкен қайғы қалдырдың", – деді ол.
Куәгер Наурызбен бірге өскенін және оны жақсы танығанын айтты. Оның сөзінше, Наурыз ешқашан жанжалқой адам болмаған және Сәрсемәлиевпен арасында қандай да бір ауыр кикілжің болғанын айтпаған.
Сондай-ақ ол Ақбаянның туыстары айыпталушыға қысым көрсетті деген нұсқаға сенбейтінін айтып, марқұм адамдарды кінәламауды сұрады.
Мұқанғалиевтің сөзінше, Нәсіп Өтешқалиева керісінше немерелеріне көмектесуге тырысқан.
Сөз соңында ол Сәрсемәлиевтің Наурыз Мұқанғалиевтің өліміне қатысты айтқан өзін-өзі қорғау нұсқасына күмән келтірді.
"Адам бір рет пышақ салғаннан кейін әдетте қаннан шошиды. Ал мұнда жүрегі тас болып кеткендей", – деді куәгер.