Талдықорғанда 3 жасар қызын сабаған әкеге сот үкімі шықты
3 жасар қызын сабап тастаған ер адам 4 жылға сотталды.
Талдықорғанда небәрі 3 жасар қызын соққыға жыққан әкеге қатысты сот үкімі шықты, деп хабарлайды KYN.KZ ақпарат агенттігі “Жетінші арнаға” сілтеме жасап.
Оқиға ақпан айында болған. Өз әкесі ұрып, денесінде сау тамтығы қалмаған бүлдіршін дереу облыстық балалар ауруханасына жеткізілген. Балақай әлі де дәрігерлердің тұрақты бақылауында.
Белгілі болғандай, кішкентай қыз бұған дейін ауыр сырқатпен күресіп, Түркияда бауырына операция жасалған. Ашуға мінген ер адам сол күні өзінің әйелін де соққыға жыққан. Күдікті өзінің тұрғылықты мекенжайынан мас күйде табылған.
Ер адамның үстінен қылмыстық іс қозғалып, туғандарына қатыгездік танытқаны үшін сот үкім кесті.
“Оқиғаға байланысты азаптау және ұрып-соғу белгілері бойынша сотқа дейінгі тергеп-тексеру жүргізілді. Тергеу қорытындысы бойынша қылмыстық іс айыптау актісімен бірге сотқа жолданды. Талдықорған қалалық сотының үкімімен сотталушы кінәлі деп танылып, 4 жылға бас бостандығынан айырылды”, – деп мәлімдеді Жетісу облысы полиция басқармасының ресми өкілі Жанар Қалықова.