Алматы қаласында жетінші сыныптың екі оқушысы алтыншы сынып оқушысын өлтірді деген күдікке ілінді. Марқұм баланың әжесі мен тәтесі күдіктілердің отбасы келіп, кешірім сұрағанын айтты, деп хабарлайды KYN.KZ ақпарат агенттігі.

Алматының Түрксіб ауданында №32 мектептің 6-сыныбын жаңа ғана аяқтаған 12 жастағы Абылайхан Ержанұлы қаза тапты. 10 маусым күні кешке осы мектептің екі жетінші сынып оқушысы оны кездесуге шақырған. Олардың бірі баланы қарсы алып, алдап екіншісінің үйіне апарған.

«Кеше кешкі сағат 19:30 шамасында немеремді жетінші сыныптағы екі бала шақырып алды. Біреуі оны қарсы алып, алдап екіншісінің үйіне апарған. Сол жерде оған асхана пышағымен тоғыз рет пышақ жарақатын салып, оқиға орнында өлтірген. Бізге қоңырау шалып, немереміздің осы жерде жатқанын айтты. Біреу оны танып, бізге хабар берген. Біз бірден жүгіріп бардық, бірақ жеткенше жедел жәрдем оның қайтыс болғанын растаған еді. Барлығы өте тез болған», – дейді әжесі.

Отбасының айтуынша, қылмыстың себебі әзірге белгісіз. Абылайхан каратэмен айналысқан, қара белбеу иегері болған және мектепте ешқандай мәселесі болмаған.

Оқиғадан кейін күдікті баланың ата-анасы келіп, кешірім сұрағанымен, марқұмның туыстары оларды қабылдамаған.

«Ол балалардың ата-анасы кешірім сұрап келді. Бірақ мен баламның денесі жерде жатқанда қалай кешірім беремін? Оны аса қатыгездікпен өлтірген, денесінде сау жер қалмаған», – дейді әжесі.

Марқұмның жақындары 13 жастағы жасөспірімнің қылмыстық жауапкершіліктен құтылып кетуі мүмкін деген ақпаратқа ерекше алаңдаулы.

«Бізге 13 жастағы бала жазаға тартылмайды деп айтып жатыр. Бұл қалай болғаны? Неге ол өз әрекеті үшін жауап бермеуі керек? Бұл қандай заң? Егер балалар бір-бірін өлтірсе, болашақтан не күтеміз? Ол ертең қандай адам болып өседі?» – дейді туыстары.

Алматы қалалық полиция департаменті 13 жастағы күдіктінің ұсталғанын хабарлады. Қазіргі уақытта ол арнайы мекемеге орналастырылған.