Кәсіпкер Тимур Турлов: Әлем елдерімен салыстыра қарасақ, Қазақстанда жолы болғыштар өмір сүреді

"Жапониядан Бельгияға барар жолда Алматыда тамаша жексенбі өткіздім.

Осындай сәтте өзіме де, айналамдағыларға да неге дәл осы елде және дәл осы күрделі кезеңде өмір сүріп жатқанымыздың сәттілік екенін еске салғым келеді.

1. Қазақстан — жас мемлекет. Мұнда адамдар әлі де салыстырмалы түрде ерте отбасын құрады, отбасылар үлкен, балалар көп. Көп балалы болу — керемет. Мұндай жағдайды ең бай елдерден де, біздің әл-ауқат деңгейімізге жақын мемлекеттерден де жиі кездестіре бермейсіз. Бұл жақсы, өйткені бізде күш-қуат көп, өзгеріс жасауға, бизнес құруға, жұмыс істеуге, жаңа мамандықтар мен технологияларды меңгеруге деген ұмтылыс жоғары. Шын мәнінде, бұл — өте үлкен артықшылық. Мұны анық түсіну үшін көп саяхаттау керек.
2. Қазақстан — бай ел. Сатып алу қабілеті паритеті бойынша жан басына шаққандағы ЖІӨ көрсеткішінде біз Түркия, Грекия және Қытайдан да жоғары тұрмыз. 2025 жылы ЖІӨ бойынша Ресейден оздық. Бұл — алғаш рет болған жағдай. Сонымен қатар біз «орта табысты» көршілеріміздің көпшілігіне қарағанда әлдеқайда жылдам өсіп келеміз. Өсім 5-6 пайызға дейін жетіп отыр, ал әлемдік орташа көрсеткіш көбіне 2-3 пайыз шамасында. Бұл біз бен балаларымыздың заманауи технологияларға, білімге және серіктестік мүмкіндіктеріне әлемнің көптеген елдеріне қарағанда тезірек қол жеткізіп жатқанын білдіреді. Мен елімде жоғары білімге, жасанды интеллектке қолжетімділікке сұраныстың құрылымдық тұрғыдан өте жоғары екенін көріп отырмын. Мемлекет те қазір білім саласына тәуелсіздік алғаннан бергі рекордтық деңгейде қаржы бөліп жатыр. Адами капитал шынымен өсіп келеді. Әр келесі ұрпақ құндылықты тиімдірек қалыптастырады, демек біз одан әрі байи түсеміз.
3. Біз — технооптимистер мен кәсіпкерлер ұлтымыз. Біз жауапкершілік алудан және тәуекел етуден қорықпаймыз. Біз ненің мүмкін екенін түсініп үлгердік және көбіне бұдан азына келіспейміз. Біз — бұрын жүрілмеген жолда міндетті түрде кездесетін қиындықтарды еңсеріп, көтере алатын күрескер халықпыз. Адамдарға конструктивті еркіндік, әділ ойын ережелері және үлкен дүние жасап, жақсы табыс табуға мүмкіндік берсең, олар Хогвартссыз-ақ нағыз сиқыр жасайды. Мен соңғы жылдары Қазақстанда пайда болғандай мықты технокәсіпкерлердің мұндай шоғырын басқа еш жерден кездестірген емеспін. Меніңше, бұл — ортаның, жоғары деңгейдегі басымдықтардың және біздің дала ауасында бар мәдениеттің бір бөлігі. Ол мәдениет бізде әрқашан болған",-деп жазған кәсіпкер әлеуметтік желідегі жеке парақшасында.