ҚТЖ-ға жаңа басшы тағайындалды
Елжас Мұратұлы Отыншиев "Қазақстан темір жолы" ҰК" АҚ басқарма төрағасы лауазымына тағайындалды.
"Қазақстан темір жолы" (ҚТЖ) ұлттық компаниясының басқарма төрағасы болып Елжас Отыншиев тағайындалды. Бұл туралы "Самұрық-Қазына" қоры мәлімдеді, - деп хабарлайды KYN.KZ тілшісі.
"Самұрық-Қазына" АҚ басқармасының шешімімен Елжас Мұратұлы Отыншиев "Қазақстан темір жолы" ҰК" АҚ басқарма төрағасы лауазымына тағайындалды", - деп жазылған хабарламада.
Елжас Отыншиев Мәскеу физика-техника институтының бакалавриаты мен магистратурасын "жалпы және қолданбалы физика" мамандығы бойынша бітірген.
Еңбек жолын 2007 жылы Ernst & Young компаниясының Мәскеудегі кеңсесінде бизнесті бағалау және мәмілелерді сүйемелдеу департаментінің кеңесшісі болып бастады.
2009-2019 жылдар аралығында "Самұрық-Қазына" АҚ және оның еншілес компанияларында жұмыс істеді.
2021-2023 жылдары KIDF-те басқарушы лауазымдарда қызмет етіп, инвестициялық портфельді басқаруға жетекшілік етті.
2023 жылғы сәуірден бастап қазірге дейін "Самұрық-Қазына" АҚ стратегия және активтерді басқару жөніндегі басқарушы директоры - басқарма мүшесі қызметін атқарды. Бұл лауазымда қордың мұнай-газ, теміржол, тау-кен және басқа да секторлардағы портфельдік компанияларын басқаруға жауапты болды.
2024 жылғы ақпаннан бастап - "Қазақстан темір жолы" ҰК" АҚ директорлар кеңесінің мүшесі.