Синоптиктер тамыз айында еліміздің басым бөлігінде қуаңшылық болуы мүмкін екенін болжады
Кейбір өңірлерде құрғақшылық болады.
«Қазгидромет» синоптиктері тамыз айының басына арналған ауа райы болжамын жасады. Еліміздің бірқатар өңірінде қуаңшылық болуы мүмкін, деп хабарлайды KYN.KZ ақпарат агенттігі.
Синоптиктердің мәліметінше, қуаңшылық Батыс Қазақстан облысының Бөкейорда және Жәнібек аудандарында, Ақтөбе облысының Шалқар мен Ырғыз аудандарында, Атырау облысының Құрманғазы ауданында, Жетісу облысының Алакөл және Ақсу аудандарында болуы ықтимал.
Сондай-ақ Жамбыл облысының Мойынқұм, Қордай, Сарысу, Талас, Шу, Жамбыл және Байзақ аудандары, Түркістан облысының Арыс, Созақ, Ордабасы, Шардара, Түлкібас және Бәйдібек аудандары да қауіп аймағына енген. Ал Қызылорда облысында Арал, Қазалы, Қармақшы, Шиелі аудандары мен Қызылорда қаласында да тамыздың басында құрғақшылық күтіледі.
Сонымен бірге Солтүстік Қазақстан облысының Тимирязев және Есіл аудандарында, Қостанай облысының Ұзынкөл және Қамысты аудандарында ылғал мөлшері орташа деңгейден жоғары болады деп болжанып отыр. Елдің қалған аумағында ылғалдану жағдайы көпжылдық қалыпты деңгейге жақын болады.
Болжам agrodata.kz платформасында және «Қазгидрометтің» ресми сайтында жарияланған.