Полиция күнбағыс алқабына суретке түсетін қазақстандықтарға ескерту жасады, деп хабарлайды KYN.KZ ақпарат агенттігі.

Ведомствоның баспасөз қызметінің мәліметінше, Астана-Щучинск автожолының бойындағы күнбағыс алқаптарына қызыққан жүргізушілер жол ережелерінің талаптарын елемей, көліктерін жол үстіне қояды.

Ақмола облысы ПД патрульдік полиция батальонының 2-взводы командирінің міндетін атқарушы, полиция капитаны Ербол Дүйсетай бұл учаске – көлік тоқтатуға тыйым салынған белгі барын ескертеді.

Күнбағыс гүлдей бастағалы бері патрульдік полиция қызметкерлері жол белгілерінің талаптарын елемеген 25-ке жуық жүргізушіні әкімшілік жауапкершілікке тартқан.

Полицейлер жол үстіндегі аялдама жол қауіпсіздігіне қауіп төндіретінін еске салады.

"Жүргізуші патрульдік көлікті көре салысымен кетіп үлгерсе де, бұл бұзушылық үшін жауапкершіліктен босатпайды", - деп ескертті полиция қызметкерлері.

Тәртіп сақшылары азаматтарды өміріне қауіп төндірмеуге және фотосуреттер үшін автобан үстінде тоқтамауға шақырады. Суретке түсіру үшін тек рұқсат етілген және қауіпсіз орындарды таңдау қажет.