Үкімет 2027 жылы инфляцияға болжам жасады
Қазақстан үкіметі 2027 жылы инфляцияның ең жоғары шегі 9,5 пайыз болады деп күтуде. Бұл көрсеткіш елдің жаңа әлеуметтік-экономикалық даму жоспарында жоғарғы шек ретінде белгіленген. Оны Үкімет отырысы барысында Премьер-министрдің орынбасары – Ұлттық экономика министрі Серік Жұманғарин атады, деп хабарлайды KYN.KZ ақпарат агенттігі.
Жұманғариннің айтуынша, құжатта инфляцияның болжамды дәлізі белгіленген.
«2027 жылы инфляцияның болжамды дәлізі 7,5–9,5 пайыз деңгейінде айқындалды», – деді ол.
Отырыста сөз сөйлеген Тимур Сүлейменов Қазақстандағы инфляция деңгейінің төмендеп келе жатқанын атап өтті.
Оның айтуынша, өткен жылдың қыркүйегінде 12,9 пайызға жеткен шарықтау шегінен кейін инфляция 10,2 пайызға дейін төмендеген. Инфляцияның төмендеуі қатарынан он ай бойы жалғасып келеді.
Ол инфляцияның баяулауына әсер етіп отырған бірнеше негізгі факторды атады: салыстырмалы түрде қатаң ақша-кредит саясаты және теңге бағамының нығаюы.
Сонымен қатар Сүлейменов инфляция деңгейінің әлі де жоғары екенін атап өтті. Оны одан әрі төмендету үшін мынадай шаралар жоспарланып отыр:
• теңгелік активтердің тартымдылығын сақтау және артық сұранысты тежеу мақсатында салыстырмалы түрде қатаң ақша-кредит саясатын жалғастыру;
• ақша-кредиттік реттеудің қосымша шараларын, оның ішінде алтын сатып алу операцияларын «айна қағидаты» бойынша теңгеруді қолдану;
• банктер үшін ең төменгі резервтік талаптарды кезең-кезеңімен арттыруды жалғастыру.
Сүлейменовтің айтуынша, осы шаралардың нәтижесінде бір жыл ішінде экономикадан жалпы шамамен 4,1 триллион теңге шығаруды жоспарлап отыр. Бұл артық ақша массасын азайтып, инфляцияның баяулауына ықпал етуі тиіс.
«Қабылданған бірлескен шаралардың нәтижесінде Ұлттық банк жағдайды бақылауды жалғастырады. Кредиттеудің жекелеген сегменттеріндегі тәуекелдер күшейген жағдайда макропруденциялық реттеудің қосымша шаралары қаралатын болады», – деді Сүлейменов.