"Біз бұл ақпаратпен жұмыс істеп жатырмыз", — деді ІІД қызметкері. Сочи олимпиадасының қола жүлдегерін ақтық сапарға шығарып салу күні "Время" басылымында сенсациялық ақпарат жарияланды. Редакцияға Астана тұрғыны жүгініп, Денис Тенге шабуыл жасағандардың бірі Арман Құдайбергеновті танитынын айтқан. Ер адамның айтуынша, 11 шілде күні Құдайбергенов Астанада оның көлігінің айнасын ұрламақшы болып, қылмыс үстінде ұсталған. Сөйтіп Алматы ауданының ішкі істер бөліміне жеткізілген. Тыңдау елорданың Алматы аудандық сотында өтуі тиіс болған. Белгілі болғандай, ұрлықшы ешқайда шықпау туралы қолхатпен қамаудан босатылған. Алайда Алматыға кетіп, көлік тонаумен айналысқан. Бұған дейін полиция таратқан ақпаратқа сәйкес, Арман Құдайбергенов сотты болған. 2013 жылдың тамызында тонау ісі бойынша кінәлі деп танылып, бас бостандығы шектеліп, сот залынан босатылған.