Жақын досы Денистің сезімге толы әндерінің қай аруға арналғанын айтты

Жігітке жеті өнер де аз дегендей, Денис өзінің композиторлық, орындаушылық дарынымен елді таң қалдырып үлгерген. Оның инстаграм желісіндегі авторлық әндері өз тыңдармандарын тауып, Ренат Гайсин сынды композиторлардың көңілінен шығып, тіпті, оның музыкалық таланты жоғары бағаланған. Бұл жайлы "Тен есімді жұлдыз" атты деректі фильмдегі жақындарының сұхбаттарында айтылады.

"She won't be mind" әні  “Ол ару менің барлық шығармашылығым соған ғана арналатынын білмейді”, -  деп басталады. Ал, Денистің өз әндеріне сөзін өзі жазғанын ескерсек, махаббатқа толы әннің кімге арналғаны кімді болса да қызықтыратыны сөзсіз. Денистің жақын досы, Швейцарияда өз кәсібін жүргізетін Айгелия Мурзабекова ән жайында өз пікірімен бөлісті: “Денистің өзі айтқандай, ол сұлулықты сүйетін. Әдемі дүниеге ғашық болатын. Бірақ белгісіз уақыттан кейін суып кететін. Егер адамды ұнатса, сезімі мәңгілікке ұласатын. Барлық адамдардан, барлығының Жан дүниесіне үңілетін. Денистің пікірінше, She won’t be mine өлеңі мүлдем жауапсыз махаббат туралы емес. Керісінше, мүмкін емес сезімдер жайында. Егер ойланып қарасаңыз, “жауапсыз” бен “мүмкін емес ” деген екі түсініктің айырмашылығы бар”,— дейді ол. “Бұл өлеңді Денис бірнеше жылдар бойы жазды деп ойлаймын. 2015 жылдың өзінде ол төрт құрлықтың чемпионатында өнер көрсету үшін бір әнге хореография дайындаған еді. Сол кезде хореографияның мүмкін емес махаббат жайлы жазылған әнге арналатынын айтқан”, — дейді Айгелия Мурзабекова.

Спортшының жақын досы белгілі актер Санжар Мади өз сұхбатында:"Денис Тенді өз арамызда "мачо" деп атайтынбыз. Үнемі жігіті бар қыздарға қарайтын", - деді. Сол себепті болар, барлық әндерінің басты жеткізер ойы "мүмкін емес махаббат" дерті. Бір өлеңінде ол: “Сен ешқашан мендік болмайсың Сен тым кішкентайсың Сен тым ақылдысың Менде жоқ нәрсенің  бәрі сен де бар”, — деп белгісіз аруды өзінен биік қою арқылы өзінің сезімге деген беріктігін білдірді. Денис Cloud in the sky өлеңінде ғашығын періштеге, ал өзін оған ешқашан қолы жетпейтін аспанда жүзіп жүрген бұлтқа теңеген. Ол “Біз әзірге бұл өмірде бірге бола алмаймыз” деген өлең жолдары арқылы спортшы өз өмірінің қамшының  сабындай қысқа екенін сезгендей: “Мүмкін сен дәл мен сияқты біреуді іздеп жүрген шығарсың, Саған қамқорлық танытып, сені жақсы көретін мендей біреуді іздейтін шығарсың,” — дейді ол. Денис барлық өлеңдерінде бір ғана ару жайлы жырлайтыны сөзсіз. Оның қоңыр көздерінің өзі бір өлеңге арқауы болған. Инстаграмдағы парақшасында Денис Тен “Brown Eyes” әнін қоңыр көзді қыздарға арнайтынын жазды. “Cебебі, бүгін кешке мен сенің көздеріңе батып кететін сияқтымын” дейді бейтаныс қызға ғашық болған елдің сүйікті ұлы.